Registers van de Hollandse grafelijkheid 1299-1345

Dirk, burggraaf van Leiden, ridder, verleent een aantal goederen die zijn broer Willem van Leiden van hem in leen houdt als lijftocht aan Willems echtgenote vrouw Badeloch; de oorkonde wordt meebezegeld door graaf Willem III en vier met name genoemde leenmannen van Dirk.

Ic Dieric burchgrave^a van Leyden, ridder, make cont allen luden dat Willem^b van Leyden^c, mijn broder, voer mi comen es ende hevet mi ghebeden vriendelic dat ic ver Badeloghen^d, sinen wive, gheven wille tote hare lijftochte van mi te houden alsulc goet alse Willem van Leyden^e vors. van mi hout te lene, legghende in zulken steden als hier nae ghenoemt sijn, dats te wetene: in Valkenburch ambocht neghen morghen lands dat gheheten es Woutersbroec^f; voert vierdalf morghen lands die Willem vors. cochte jeghens Dieric^g van Zevenhusen; item int ambocht van Oestgheest^h neghen morghen lands die Willem voernoemt cofte jeghens mi; voert vijftalf morghen lands die mijn here onse vader, daer God die ziele of hebben moet, Willem gaf doe hine van hem goede; item vierdalf morghen lands die Willem vors. cochte jeghens Cocsinsⁱ kindere ende ene morghen die hi cochte jeghens heren Jan van den Zile, legghende in die Ruwe zidde^j; voert drie morghen die Willem vors. cochte jeghens Petmans kindere ende anderhalf morghen die hi wandelde jeghen der abdissen van der Lee; item vijf hond lands die mijn here onse vader hem gaf, legghende achter Jacob Pouwels^k soens; voert vijf morghen lands ende II hond an den dijc dat Willems^l land gheheten es; item in Polegheester^m ambocht vijftalf ⁿ hond lands die Willem vors. cochte in Willem Mommen^o lande; voert vijftalf morghen lands die Jacob Muerkijn nu te tide in hueren hevet; item vierdalf morghen die Dieric^p Petmans sone nu te tiden in hueren hevet; voert anderhalf^q morghen die Clays Duenevoet^r nu in hueren hevet; item II morghen die Willem vors. cochte jeghens Petmans kindere vor sinen lane ten Poele; item die woninghe upt Zand^s met al den lande datter toe behoert, dats te verstane tuschen tscut ende den Rine; voert up die zuytzide alse verre als die plaetse gaet ende up die noertzide streckende an den Vliet ende die weyde alsoe alse ter woninghe toe behoert; item int ambocht van sGraven zande in Teylingher^t land vijf morghen lands; voert in Monsterambocht^u zestalf morghen lands, legghende an den Zuarten^v dijc bi der huele; item zevendalf morghen lands in die Laghe doer toghe. Ende want Willem mijn broder vors. al dit vorscreven goet van mi hout te lene ende ^w hijs begheert, zoe hebbe ic ver Badeloghen^x, sinen wive voernoemt, ghegheven al dit vorseyde goit van mi te houden tote hare lijftocht, sonder enigherhande arghelist.

Ende want ic al dat hier vorscreven es vaste ende ghestade houden wille, zoe hebbe ic desen brief bezeghelt met minen zeghele; ende om die meere zekerhede hier of hebbe ic ghebeden minen lieven ende gherechten here, heren Willem grave van Heynnegouwen^y etc., ende minen mannen heren Jacob van den Woude, heren Jan van den Zile, ridderen, Willem van Leyden minen broder zelve vorscreven, ende Henric^z Streveland^a', knapen, dat si desen brief met mi beseghelen willen. Ende wi Willem grave vors., Jacob van den Woude, Jan^b' van den Zile^c', ridders, Willem van Leyden^d' ende Henric^e' Streveland^f', knapen, om bede wille heren Dierix^g', borchgraven vorscreven, hebben desen brief bezeghelt met hem met onsen seghelen in kennesse van al deser ding vorscreven. Dese brief was ghegheven int jaer ons Heren M CCC zes ende twintich des vrijdaghes nae Paeschdach.