Registers van de Hollandse grafelijkheid 1299-1345

Graaf Willem III verkoopt aan Nicolaas Rengersz. het ambacht Moordrecht, de molen, een jaarrente van 3 pond alsmede het ambachtsgerecht, welke goederen Nicolaas in recht leen zal houden; voorts verkoopt hij hem de woning met toebehoren te Moordrecht in vrij eigendom, waarbij de koopsom wordt afgetrokken van de schuld die de graaf bij Nicolaas had ten behoeve van heer Jacob van Moordrecht, de vorige houder van al deze goederen, die ze aan de graaf had verkocht.

Vgl. het voorafgaande nr. NH 473.

Wi Willaem^a grave etc. maken cond etc. dat wi Clays Rengaers^b sone, onsen ^c trouwen man, vercoft hebben ende verghift dat ambocht van Moirdrecht^d ende die molen aldair ende drie pond sjers^e die dair toe behoren alse van beden, van land sise^f ende van waterghanghe ende al dat ambochts recht, also als wijt cofte jeghens heren Jacob van Moirdrecht^g ende hijt van ons helt ende ons op droch voir onse manne, ende Clays voirs. ende sine nacomelinghe houden sullen ten rechten lene van ons ende van onsen nacomelinghen; voirt hebben wi Clayse voirs. vercoft over^h vri eyghen goed die woninghe te Moirdrechtⁱ mitter timmeringhe diere toe behoirt ende mit al den rechte dat hair Jacob voirnoemd hadde an die seven viertel lands ende een half, legghende binnen desen palen: die kerchoeve an die west side tote Jan Dierix^j f. veen toe ende Jan Dierix f. veen voirt in die Piclede, die Piclede ant noirtende, Ghibe Wouters f. land an die oistzide ende die Ysel ant zuitende^k, also als wijt jeghens heren Jacob voirs. coften ende hi ons vriliken op droch voir onse manne. Wilc ambocht^l, mole, renten ende al goed voirscreven Clays voirs. cofte jeghens ons^m al omme VII^C lb. Hollandsⁿ, die hi ons wel ende al betailt heeft den ersten penning mitten lesten, want wise hem of sloghen van sulker scout als wi hem voir heren Jacob sculdich waren. Ende gheloven Clayse voirnoemd ende sinen nacomelinghen dit ambocht ende alle goed voirscreven te waren^o jeghen elken mensche^p, ende dair in te houden in allen manieren voirscreven.

In orkonde etc. Ghegheven op sente Lisebetten^q dach int jaer ons Heren M CCC ende^r XXX^o.