Registers van de Hollandse grafelijkheid 1299-1345

Graaf Willem III belooft Jacob Gerardsz., klerk van Floris van der Boekhorst, dat deze beleend zal worden met de 5 morgen land die diens oom IJsbrand Verdegersz. in leen houdt, mocht die laatste zonder wettig nageslacht komen te overlijden.

Willem grave etc. maken cond allen luden^a dat wi Jacop^b Gherijts^c sone, Florens^d clerc van den Bouchorst^e, sulke gratie ghedaen hebben dat alsulc land als hier na ghescreven staet ende Ysebrant^f Verdegheers^g sone, Jacobs oem voirnoemd, van ons te leene houd, storve Ysebrant^h sonder wittachtighe borte, comen soude up Jacob voirscreven, ende die soud van ons houden ten rechten leene; ende des lands sal wesen mar vijf morghen, legghende an veel sticken: inden eersten onder Willem Vinken huys een acker, achter Jacob Betten soeneⁱ in den Haghe veen een deel, up die merske bi Andries Wolwiches^j soens^k huyse een deel, bi den wale een deel achter Jans huse van der Bouchorst^l ende es gheheten Butendike^m een deel, voir Claisⁿ Jacobs zoens een campekiaen, achter Gherijd^o Jans soens huse in den broec een deel.

In orconde desen brieve beseghelt met onsen zeghel^p. Ghegheven in den Haghe up der Elf dusent magheden dach int jaer ons Heren M CCC drie ende dertich.