Registers van de Hollandse grafelijkheid 1299-1345

Graaf Willem III geeft, op verzoek van zijn oom bisschop (Gwijde) van Utrecht, aan de inwoners van die stad nader omschreven tolrechten in Holland, Zeeland en Friesland.

De onderstaande tekst is gebaseerd op afschrift B.

Wi Willaem^a grave^b van Henegouwen^c etc. maken cond etc. dat wi om bede ons liefs heren ende oems des bisscops van Utrecht^d hebben ghedaen zulke gratie alle den ghenen die wonen binnen der stat van Utrecht^e, dat wi willen dat si varen zullen ende keren^f doer alle onse lande van Holland^g, van Zeland^h ende van Vrieslandⁱ voer onse tollen met sulken rechte als hier na bescreven staet, dats te verstane: van elken hoede tarwen of rogghen of witter erweten tuaelf penninghe Hollansche^j; van elken^k hoet ^l ghersten of grawer erweten VIII d. Hollands^m; van enen hoet havere IIIIⁿ d. Hollands; van eere roede wijns, twie^o corte vate voer ene rode, XVII d. Inghelsche^p, ende van elker roede wijns ene halve take wijns of VI d. Hollands voer die halve take^q; ghelt of wijn te nemen zel staen an onse tolnaers, ende daer toe voer elke roede derdalven penning Hollands. Van enen scepe VIII d. Hollands; van enen packe pelserien VII scellinghe ^r ende VI d. Hollands; van enen scarlaken XVI d.; van enen dobbel gheverweden laken VIII d. Hollands; van enen striepten of blawen laken IIII d. Hollands; van enen witten laken of ghiselsayen laken II d. Hollands; van ere manheven^s marserien, tuye huven^t ende tuye paer handscone^u ende^v tuee^w scellinghe Hollands. Ende van allen anderen goede dat si voeren zullen si gheven die honderste marc voer die eerste tollen daer si voer comen, ende dan zullen si nemen der tolnare teken ter eerster tollen ende daer mede zellen si die vaerd met dien goede vri varen voer al de ander tollen. Dit sel gheduren tot onsen goeddinken ende wedersegghen.

In orkonde etc. Ghegheven in den Haghe in sinte Thomaes^x daghe int jaer ons Heren M CCC ende zestiene.