Registers van de Hollandse grafelijkheid 1299-1345

Graaf Willem III belooft bisschop Frederik II van Utrecht te zullen bijstaan in alle zaken waarin deze zich heeft laten adviseren door hem zelf en door de door hem aangestelde en met name genoemde geheime raden.

Vgl. nr. UT 35 alsmede nrs. UT 27-29 en 31.

De onderstaande tekst is gebaseerd op afschrift B.

Wi Willaem^b grave^c van Heynnegouwen^d, van Holland^e etc. maken cond allen luden dat wi gheloeft hebben ende gheloven met goeden trouwen te wisen, te helpen raden, te staerken ende te volstaen^f enen eersamen vader in Gode, onsen lieven here ende neve heren Vrederic^g, bi der ghenaden Gods biscop van Utrecht, van allen dinghe die hi doen zal bi onsen rade ende bi rade onser liever ende ghetrouwer heren Jacops biscop van Zuden, heren Jacobs proist van Sinte Janne^h, heren Arntsⁱ deken van Sinte Marien, heren Ricouds van Hesewic^j, canonic van Sinte^k Pieters tUtrecht, heren Jans here van Arcle, heren^l Ghisebrechts^m here van Yselsteyne, heren Zuedersⁿ here van Abbecoude, heren Loedwics^o landcommenduer van den Dieschenhuse^p tUtrecht, heren Symons van Benthem^q, ridder, Zueder van Vyanen, knape, Jans Boelen, Vembrechts van Compestelle^r, Jans sheren Roetaerds sone, borgher tUtrecht, die wi bi hem gheset hebben hem te wisen ende te raden, of bi enen deel van dien dertienen voirseyt, die ons hemelichste^s zien, die hi te sinen Rade eyschen zal.

Ende want wi dat vaste ende ghestade houden willen, zo hebben wi desen brief bezeghelt met onsen zeghele. Ghegheven tote Zerixee^t des dinxendaghes na sinte Thomaes dach int jaer ons Heren M CCC een ende twintich.