Registers van de Hollandse grafelijkheid 1299-1345

Graaf Willem III doet uitspraak in het geschil tussen zijn zwager Zweder van Montfoort en diens zoon Hendrik de Rover.

Vgl. nrs. UT 34 en 58, alsmede nrs. WO 70 en 71.

De onderstaande tekst is gebaseerd op afschrift B.

Wi Willaem^c grave^d van Heynnegouwen^e etc. maken cond allen luden dat dit sien die puynte die wi gheordineert hebben mit onsen ghemenen Rade tuyschen Zueder^f van Montfoirde onsen zuagher ende Heynric^g den Rover sinen sone, des si an ons bleven sien te houden onse segghen. In den ersten segghen wi dat Zueder^h ende die joncfrou van Montfoirde sijn wijf, onse nichte, ghegoed sullen wesen uten goede van Montfoirde ende mit hore medeghave tote seven hondert ponden Tornoyseⁱ sjaers zuarte, enen groeten Tornoyse^j voir sestien penninghe ^k jof payement dat dair jeghens ghaet; ende waer oec dat sake dat Zueder^l wonne kinder van desen daghe vorwaert bi der joncfrou van Montfoirde sinen wive, die souden si goeden ute desen goede dat hier ghenoemd es bi onsen goeddenken. Voirt segghen wi dat Heynric^m die Roverⁿ, sijn soen^o, hebben sal uten goede dat te Montfoirde toe behoirt seven hondert pond Tornoyse^p sjaers an sulken paymente alse voirscreven es. Voirt sal Heynric^q die Rover^r hebben dat huys te Montfoirde ende alle die gherechten die dair toe behoren ende die heerscapien, uyt ghenomen die gherechten die Floris^s ende Willaem^t, dies^u Rovers broederen voirs., ontfanghen hebben. Voirt sullen hebben joncfrou Adelise, Floris^v ende Willaem^w, Zueders^x kindere voirscreven, vijf hondert tachtich pond sjaers des selves payments dat voirs. is; ende waer dat sake dat Floris^y ende Willaem^z ghegoed waren an enighen goede dat si ontfanghen hadden voir dese tijd, dat soudemen hem ofslaen van desen V^C ende LXXX lb. Tornoyse^a' sjaers, ende dese V^C ende LXXX lb. sullen wi delen onder die suster^b' ende broederen die voirnoemd sijn na onsen goeddenken. Vort sullen hebben Zueders^c' twe susteren, joncfrou Lisbet^d' ende joncfrou Machtelt, uten goede van Montfoirde tachtich pond sjaers des selves payments voirnoemd an eygheliken goede, ende dair op sullen si quite scelden alle die erfnesse van vader ende van moeder, ende dair toe dat goed dair si aen bewijst waren, dair si die renten of op gheboirt hebben toit deser tijd toe, zullen si mede quite scelden ende op draghen; ende mit desen goede moghen dese twe joncfrouwen horen wille doen. Ende waer dat sake dat dat goed van Montfoirde so vele niet renten en mochte alse dese bewisinghe belopet an Zueder^e' van Montfoirde, an Heynric^f' den Rover sinen sone, aen joncfrou Adelisen, Floris^g' ende Willaem^h', Sueders^i' kindere, dat soude staen toit ons selves verclaringhe jof der gheenre die wi dair toe setten souden van onsen weghen elker mallic te verminderen bi onsen goeddenken. Ende dese bewisinghe ende dit goed te sceyden sal staen van onsen weghen an den biscop van Zuden, an heren Symon van Benthem, an Zueder^j' van Vyanen ende an^k' Jacob Jans sone; ende en moghen sijs niet over een comen, dat sal staen toit onsen verclaersen. Voirt sal Heynric^l' die Roever^m' mombair wesen siere broedere Floris^n' ende Willaem^o' tote diere tijd toe dat si hore jare hebben; ende alse si dair toe comen, sullen si verlien bi ons of bi den ghenen dien wijt bevelen sullen. Voirt ist vorwairde, wair dat sake dat Heynric^p' die Roever^q' storve ende Zueder^r' sijn vader ende die Roever kinder liete, so soude dien kinderen bliven alsulc goed alse hier^s' voirscreven is also langhe alse Zueder levet, ende na Sueders^t' doet so sullen die kindere hebben alsulc goed alse die hantveste hout dairt huwelijc van Heynric^u' den Roever^v' voirs. ende joncfrou Agniesen sinen wive mede ghemact es, die onse lieve here ende oem die biscop Guy van Utrecht^w', dair God die ziele of hebben moet, ende wi bezeghelt hebben. Voirt sijnt vorwaerden, wairt dat van Heynric^x' den Rover ghebrake eer sijns vader, en kinder liete die onbejaert waren, zo souden wi dat huys te Montfoirde ende die gherechte ende heerscipie die dair toe hoeren bevelen dien wi wilden ter kinder behoef ter tijd toe dat si hoir jare hadden, ende die ons dochte datter die kinder beste mede bewart waren. Vort so es ons segghen van alre scout die Zueder^y' ghemact hevet, dat hi die selve betailen sal ende den last ^z' daer of draghen; ende van der scoud die die Rover ghemact hevet, sal Rover des ghelike doen. Voirt is onse segghen van menigherande broke die Zueder^a'' jeghens ons verbroken hevet, dat hi ons weder gheven sal enen open brief die hi van ons hevet van dusent ponden zuarter Tornoyse^b'', ende onse borghen quite scelden die hi dair of hevet; ende noch dair toe so sal hi ons gheven twe dusent pond zuarter Tornoyse^c'' al gherede ende dair toe vijf hondert des selves payments, die te keren dair wi willen. Ende alle dese pointe die wi gheseghet hebben alse voirscreven is segghen wi an beyden siden wel ende trouweliken te houden, bi tien dusent ponden Tornoyse^d'' diere tieghens dede. Ende waer dat sake dat hier in enich stoet quame, dar houden wi tote onse verclaersenghe. Vort zo is noch onse segghen: ist dat Heynric^e'' die Rover^f'', Zueders^g'' sone, enich ghelt vonden hevet up den huse te Montfoirde of noch vonde, dair bi en sal Heynric^h'' voirscreven niet doen anders dan bi onsen rade.

Dit was gheseghet ende ghedaen int jaer ons Heren M CCC drie ende twintich des dinxendaghes na Paesdaghe.