Registers van de Hollandse grafelijkheid 1299-1345

Hendrik de Rover, zoon van Zweder van Montfoort, verbindt zich voor zichzelf en voor zijn nakomelingen om de graaf van Holland met alle middelen te bij te staan tegen ieder ander, inclusief zijn andere leenheren wanneer de graaf daarmee in oorlog mocht zijn, aan wie hij dan de leenband zal opzeggen; de oorkonde wordt meebezegeld door zijn schoonvader heer Gijsbrecht heer van IJsselstein en zijn zwager heer Arnoud van IJsselstein, ridders, en zijn oom Roelof de Rover.

De onderstaande tekst is gebaseerd op afschrift B.

Allen den ghenen etc. make ic cond Heynric^f die Rover, Sueders^g sone van Montfoirde. Want een edel prinche ende een moghende, mijn lieve here hair Willaem^h graveⁱ van Heynnegouwen^j etc., wes maech^k ic ben, sine goedertierenhede ende sine doghet menich warven ane mi ghedaen hevet ende noch daghelijsch doet, ende mi naist Gode niemand bet helpen en mach dan hi ende sine nacomelinghe, ende oec mi ghehulpen hevet daer ics groetelijc te doene hadde, soe hebbe ic mit minen vrien wille mi ende minen nacomelinghe^l verbonden ende verbinde mit desen brieve minen lieven here den grave^m voirseyd ende sine nacomelinghe te dienen ende te helpen mit live, mit goede, mit rade, mit dade, metter burch te Montfoirde, mit allen den gherechten ende luden die ter heerscipien van Montfoirdeⁿ toe horen, ende mit alle der macht die ic hebbe of ic ende mine nacomelinghe hebben sullen, tyeghens elken man die levet of leven sal, gheestelike of waerlike, in so wad stade dat si sien, est groet est cleyne, ende dit sullen ic ende mine nacomelinghe ghereet wesen te doene tallen tiden alst ons onse lieve here die grave voirs. ende sine nacomelinghe te weten sullen doen, behouden dat wi elken here dair wi goed of houden ende die onse here die grave voirs. orloghen wilde^o jof parlement tyeghens hebben, dat wi dien here sonder merrren na dien dat ons es te weten ghedaen sijn goed opdraghen jof op senden moghen ende ons dair bi bewaren eer wi tieghens hem enighe stucken deden; ende als ic ende mine nacomelinghe ons bewart hebben alse voirscreven es tyeghens onsen heren dair ic mijn goed of houde, so sal ic of mine nacomelinghe uterliken dienen minen here den grave voirs. ende sinen nacomelinghen mit den huse te Montfoirde voirs. ende mit dien dat dair toe behoirt, jof ic ende mine nacomelinghe sullen thuys voirs. hem op gheven ende vriliken leveren sinen vrien wille mede te doene also langhe alst orloghe duret; ende alst orloghe ghedaen es ende ghesoent, so sullen hi ende sine nacomelinghe mi ende minen nacomelinghen thuys voirs. weder leveren alse voirscreven es. Voirt so en sal ic noch mine nacomelinghe nimmermer verbint maken binnen lands noch buten lands met niemande^p die levet buten mijns heren^q sgraven wille ende oirlove voirs. jof siere nacomelinghe graven van Holland^r; ende heb ic enighe ghemact, es mit hande, mit monde, mit brieven jof hoe dat si, die scelde ic quite mit desen brieve ende gheloefse niet te houden. Ende wiste ic jof mine nacomelinghe jof vernamen iemand die verradenisse tyeghens hem jof sinen lande jof sinen nacomelinghen dreve jof jaghede, dat souden wi hem laten te weten sonder merren also sciere als wijt vernemen mochten jof wisten, ende dat souden wi verhoeden trouwelike met al onser machte. Ende alle dese pointe voirscreven hebbe ic ghelovet ende ghelove voir mi ende voir mine nacomelinghe witteliken ende trouweliken te houden minen lieven here den grave voirs. ende sinen nacomelinghen, sonder arghenlist, bi minen ghesuoren eede, bi miere gheghevenre trouwe ende bi miere^s sekerhede. Ende wart dat ic ende mine nacomelinghe ons in enighen pointe voirscreven verbraken^t jof niet en helden, so kenne ic met desen brieve mi selven menedich, trouweloes, witteloes ende mine sekerhede te broeken, jof mine nacomelinghe diet verbraken, ende nimmermeer man noch wijf te beclaghen noch recht van hem te nemen, noch voir gheestlijc recht noch voir waerlijc recht; ende dair toe souden ic ende mine nacomelinghe also dicke als wi dit verbint voerscreven braken verboren yeghens minen lieven here den grave voirs. jof sinen nacomelinghe V^M lb. Tornoyse^u, den groeten^v over sestien penninghe gherekent. Ende na miere doet so sullen mine nacomelinghe besitters van den huse ende van der heerscipien van Montfoirde voirs. ende dat dair toe behoirt ewelike ghedurende dit verbint vernuwen ^w jeghens den grave van Holland^x voirs. binnen jaers so wanneer dat verstorvet^y, opt verbant ende op de pene van den V^M lb. voirs.; ende also menich jaer als sijt versaten na dien dat verstorven ware dat si dit verbint niet en vernuweden, so verboerden si elcs jaers tyeghens den grave van Holland^z voirs. V^M lb. Tornoyse^a'.

Ende omme dat ic alle dese pointe voirscreven ghedaen hebbe mit minen vrien wille ende bi miere vriende rade die icker toe begheerde, so hebbe ic desen brief open beseghelt mit minen seghele; ende omme die mere sekerhede so hebbe ic ghebeden edelen luden heren Ghisebrechte^b' here van Ysselsteyne^c' mine zuer, heren Arnoude van IJsselsteyne^d' minen zuagher, ridderen, ende Roelof^e' den Roever^f' minen oem dat si in kennessen der waerheyt ende als orkonde desen brief mit mi beseghelen willen. Ende wi Ghisebrecht^g' here van Ysselsteyne^h' ende Arnoud van Ysselsteyne^i', ridderen, ende Roelof^j' die Roever^k' voirscreven omme bede willen van Heynric^l' die Roever^m' voirs. hebben desen brief mit hem bezeghelt mit onsen zeghelen alse orkonde ende in kennessen der waerheyd. Dit was ghedaen ende ghezeghelt tote Oudewater^n' des donresdaghes voir halve aprille int jaer ons Heren M CCC drie ende twintich.