Registers van de Hollandse grafelijkheid 1299-1345

Graaf Willem III en Willem van Duivenvoorde beloven heer Zweder van Vianen, ridder, diens burcht en heerlijkheid te Vianen en al diens goederen en inkomsten, die hij hun in beheer had gegeven, terug te geven wanneer zijn schuld ter hoogte van ongeveer 6.000 pond Tournois daaruit is terugbetaald, specificeren de jaargelden zij tot die tijd Zweder en diens verwanten zullen uitkeren uit deze inkomsten, en beloven daaruit voorts de noodzakelijke onkosten van deze bezittingen te zullen afhandelen; de oorkonde wordt meebezegeld door Jan van Polanen.

Wi Willem^a grave van Henegouwen^b, van Holland^c, van Zeeland^d ende here van Vriesland^e ende Willem^f van Duvenvorde maken cont allen luden. Want haer Zueder van Vianen, ridder, ons in die hand gheset heeft sine borgh te Vianen ende alle sine heerscappie te Vianen^g ende al dat daer toe behort, ende alle sine renten, lien, eyghen, tiende ende erve, pacht, veren, vischerie ende al verval dat van deser tijt vorwaerts meer van alle sinen goede vorscreven verschinen sal, uutghenomen die versterfte van sinen mannen, also als die handveste spreket van den huwelike tuschen Willem vorseid ende joncvrouwe Heylewijf^h sire dochter, in dusdanighen vorwaerden dat wi hemⁱ uyt sinen goede vorscreven jaerlix gheven zullen vierhondert pont Tornoyse^j, te betalen alle jare die ene helfte te Middewinter^k ende die ander helfte te Paeschen; vord sullen wi veren Lizebetthen^l, der vrouwen van Vianen, zinen wive, daer of jaerlix uutreyken tweehondert viertich pond Tornoyse^m, die ene helfte jaerlicse te sinte Martinsⁿ misse in den winter^o ende die ander helfte te sinte Jansmisse middezoemer^p; vord zullen wi jaerlix uyt reyken Clais^q ende Steven heren Zueders broederen ende Katerinen^r sire suster^s hondert pond Tornoyse, te betalen jaerlix die ene helfte te sinte Martins^t misse in den winter ende die ander helfte te sinte Pieters misse in de lenten^u; vord zullen wi behouden jaerlix die borgh te Vianen vors. mede te doen te verwaren twiehondert pond Tornoyse; vord sel Willem^v van Duvenvorde vors. behouden jaerlix ende vor al voir uyt nemen alse vor sijn huwelic goed twiehondert pond Tornoyse, ende daer of zal die eerste jaerscare ingaen te sinte Martins^w misse in den winter int jaer van zeven ende tuintich; ende alle renten vorscreven zullen wi betalen ten vornoemden terminen alse verre alse alsoe vele renten van sinen goede vorscreven verschinen. Vord sullen wi sine borgh, sine herscippie ende sijn goed vorscreven ende dat daer toe behord van zulken coste alst niet omberen ne mach verwaren doen met sijns goeds coste vorscreven bi enen goeden man, die wi ende hi daer toe setten zullen; ende wat sine renten ende vervalle van sire heerscippie ende goede vorscreven hijr boven jaerlix draghen moghen ter goeder rekeninghe, daer zullen wi sine scoud mede doen ghelden, die loept tote sesdusent pond Tornoyse toe of daerommetrent, ende die sullen wi also verwaren doen dat daer ghien cost meer up ne come^x, het en ware van reysen ende cost van boden die scoud mede te innen ende te betalen. Ende alsoe vele alse jaerlix van sinen renten vrye blivet boven desen vornoemden uytghesetten goede, so sal sine scoud vors. minderen van desen ses dusent ponden vorscreven; ten waer of wi hem ghelt lienden jof hem uytdeden, daer wi zinen opene^y brief of hadden, dat souden wi jaerlix weder vor uytnemen van sinen renten; ende immer jaerlix rekeninghe te doen van allen stucken vorscreven. Waeromme wi hem gheloven so wilke tijt wi sine scoud^z vorscreven in deser manieren te vollen betaelt hebben, jof dat hi ons voldoet met reeden ghelde van also vele als wi vor hem betaelt hadden^a' van desen sesdusent ponden vorscreven, so zullen wi hem sijn huus, zijn heerscippie ende al sijn goed vorscreven also vry leveren als hijt ons in die hand gheset heeft, behouden allen den vorwaerden van den huwelike vorscreven; ende alle stucken vorscreven sonder arghlist, ende ter goeder rekeninghe.

Ende om dat wi willen dat alle stucken vorscreven vaste ende ghestade bliven, so hebben wi ende Jan van Polanen alse orkunde met ons desen brief open bezeghelt met onsen zeghelen. Ghegheven in den Hage^b' up sinte Michiels dach int jaer ons Heren M° CCC° ses ende tuintich.