Registers van de Hollandse grafelijkheid 1299-1345

Gerard heer van Voorne, burggraaf van Zeeland, kent zijn kleindochter Johanna, vrouwe van Bergen op Zoom, 1000 pond zwarten Tournois jaarlijks toe uit al zijn onbedijkte landen en uit al zijn visserij op de Maas, welk jaargeld hij eerder aan zijn zoon Albrecht, haar vader, had toegezegd, en bepaalt dat deze rente te lossen is met 10.000 pond ineens en bij kinderloos overlijden van Johanna terug zal vallen aan hem of zijn erfgenamen; voorts verzoekt hij gravin (Johanna) dat zij na zijn dood Johanna zal uithuwelijken, met de bepaling dat bij een eerder overlijden van de gravin die rol zal worden overgenomen door zijn dochter de vrouwe van Valkenburg en zijn neef de heer van Arkel.

Wi Gherard here van Voirne, burchgrave van Zeelland^b, maken cond ende kenlic allen luden. Want wi Alebrecht onsen sone, dair God die ziele of hebben moet, gheloeft hadden ende sculdich waren te goeden tote tien hondert ponden toe tsyaers suarter Tornoyse^c, enen goede ouden groten coninx Tornoyse^d van Vranrike^e gherekent over sestien pennighe of payment dat daer voir gaen sal, soe hebben wi Jhannen sijnre dochter, der joncvrouwen van Berghen op den Zoem, dese voirs. tien hondert pond tsyaers bewijst ende bewisen huer ane alle onsen souten landen die nu ter tijt niet bedijct en sien, ende ane allen onsen vischerien in der Mazen, soe wair si gheleghen sien, in deser manieren dat Janne voirs. jairlixe te voren op heffen sal ende innen van den eersten renten die van desen voirscreven souten landen ende vischerien^f vallen sullen ende incomen, eer wi of onse erfnamen ende nacomelinghe dair of yet heffen sullen of innemen moghen, met desen voirwaerden: wanneer wi ende onse erfnamen der voirs. Jannen bewisen ende gheven an anderen goeden zekeren renten ende goeden tien hondert pond tsyaers payments voirs., dair^g si haer vaste ende stade sien ten land rechte, of wanneer wi hair gheven ende betalen X^M lib. payments voirscreven an ghereden ghelde, dat dan onse voirs.^h soute lande, vischerien ende renten quite ende los wesen sullen van Jannen voirnoemt ende hueren erfnamen, ende vrilikeⁱ weder comen ane ons ende ane onsen erfnamen. Ende waert zake dat Jane voirs. oflivich worde sonder levende boert of wanneer dat^j huer ghene gheboerd levende en bleve, soe sullen dese voirs. goede ende renten vrilike wedercomen up ons ende up onse erfnamen, sonder wedersegghen van Jannen erfnamen voirs. van huere moeder weghen. Ende want wi niement die leeft bet en betrouwen Jannen voirscreven te bestaden, te manne te brenghen ende huer beste te doene als wi niet langher en sien, dan eenre hogher princissen ende eenre moghender vrouwen onser liever vrouwen der ..gravinnen van Heynnegouwen^k ende van Holland^l, so heb wi hoir ghebeden ende bidden oetmoedelijc omme Gode dat si na onsen live Janne voirnoemt an huer nemen wille met desen voirscreven goeden ende renten ende dat si se dair mede berechten wille ende te manne brenghen, als wi up hair wel gheloeven boven alle die leven. Ende waert zake dat onse lieve vrouwe die ..gravinne voirscreven af livich worde, dat God verbieden moet doir sine ghenadichede, eer Janne voirs. ghemannet worde, soe beghere wi ane onse lieve dochter der vrouwen van Valkenburch ende an onsen lieven neve den here van Arkel, ende bidden hem ende vermanen bi sulker trouwe als si ons sculdich sien dat si Jannen voirnoemt besteden willen ende te manne brenghen met hueren goeden ende renten voirscreven, als wi up hem betrouwen ende si sculdich sien te doene.

Ende omme dat wi willen dat Jannen voirnoemt alle dese voirscreven stucken, renten ende goedinghe vaste ende stade bliven in manieren als voirscreven es, ende ghehouden worden van ons ende van onsen erfnamen, soe hebben wi desen brief voir ons ende voir onse erfnamen open bezeghelt met onsen groten zeghele. Ghegheven ende ghedaen te Voirne des woensdaghes na onser Vrouwen dach assumptio int jair ons Heren M° CCC° ses ende dortich.