Registers van de Hollandse grafelijkheid 1299-1345

Graaf Willem IV staat Gerard Ockersz. toe drie nader omschreven stukken land in Velsen, die deze in leen houdt, te verkopen in vrij eigendom.

Willem ..grave van Heynnegouwen^a etc. maken cond allen luden dat wi bi Willem den Cuser^b oirlof ghegheven hebben Gheret Ockers zoene in vryen eyghen te vercopen drie stucke lands ligghende te Velsen die hi van ons te liene hilt, dat eerste sticke lands ligghende in die Smele gheest ende hevet beleghen an die noert side Scaper^c, ende een half sticke lands an die noert side van Scaper^d, ende een stucke lands an die suder side van den twien stucken lands, dat beleghen hevet Willaem van Scoeten an die weest side; ende soe wie dit land copt, dien gheven wi den eyghendom met desen brieve, bezeghelt met onsen zeghele.

Ghegheven in die Haghe op sinte Andries avond^e int jaer XXXIX^o.