Registers van de Hollandse grafelijkheid 1299-1345

Jan van Polanen, baljuw van Kennemerland en van West-Friesland, Gerard van Heemskerk, baljuw en rentmeester van Amstelland en Waterland, ridders, Jan van Sassenheim en Gerard Alewijnsz. doen in naam van graaf Willem IV uitspraak in een geschil tussen de gemeenten van Gooiland en van Eemnes over de de pacht van een nader omschreven stuk veen in Gooiland en de begrenzing ervan.

Vgl. de volgende nrs. 444-449.

Wi Jan van Pollanen, bailiu van Kenemerland^a ende van Vriesland, Gherard^b van Eemskerke, bailiu ende rentemeester van Aemsterland^c ende van Waterland^d, ridderen, Jan van Zasnem ende Gherard^e Alewijns sone maken cond allen luden. Want die scepene ende die goede lude van Ghoyland diere van der ghemeenten weghen toe gheset waren, alse hoir opene brief houd die si ons dar up ghegheven hebben, an ons alze van ons heren sgraven weghen van Holland^f ghebleven sijn van des ghemeens lands weghen van Ghoyland up die eene zyde, ende die scepene ende die ghebure van Emenisse diere van der ghemeenten weghen toe gheset waren, also alse hoir opene brief houd die si ons darof ghegheven hebben, van der ghemeenten weghen van Emenisse up die ander zyde, ghebleven sien alse van den veen over die roe^g in Ghoyland ligghende, op tnord ende C roeden breet^h, upt zuyt ende III^C roeden bret, ende dat roerechtⁱ doir gaende, dat die van Goyland jeghens onsen here den ..grave van Holland^j erflike ghepacht hebben, ende dat si om oirbar ons heren sgraven van Holland^k ende onse bede med norenste^l van sinen weghen ons daer in gheloeft hebben; waer of wi med goeder vorsienicheden beraden hebben ende onse segghen darof uuten.

In den eersten es onse segghen dat die van Emenisse hebben sullen also groet alse hi vorscreven es die veen, in sulken vorwarden alse die brieve hilden daer die eerste vorwarden mede ghesproken waren. Ende hirof sullen die van Emenisse gheven overmids een lb. grote dat si ghaven van zeghel ghelde ende van scrijfghelde van den eersten vorwarden, ende hem die van Ghoyland weder ghegheven souden hebben, VI^C lb. Tornoyse^m, den groten over sestien penninghe gherekend, te betalen te Paesken naistcomendeⁿ overmids dat pond grote vorscreven vier hondert pond Tornoyse^o, ende te sinte Jacobs misse^p dar na naistcomende twee hondert pond Tornoyse; hier of sullen hebben die goede lude van Ghoyland te Paesken vorscreven die IIII^C lb. Tornoyse, ende darof selmen slaen dat pond grote vorscreven, ende die ander II^C lb. Tornoyse sullen gaen daerse die bailiu wijst te gane.

Vort sullen die van Goyland den tijns van dien vene van desen jare betalen, want die dach darof es nu te sinte Martijns^q messe^r naistcomende.

Vort sullen die van Emenisse dien veen nu ane nemen ende vort vrylike ghebruken.

Vort zel die baeliu desen veen te beyden enden of doen meten ende dat reerecht doen doir trecken; ende alse die ree doir toghen es, so sullen si van beyden syden dat of delven alse wijt ende alse diep alse den baliu goedenken zal.

Ende omme dat wi des segghens aldus over een ghedraghen sien om des besten willen, so hebben wi desen brief open bezeghelt med onsen zeghelen. Ghegheven tot Aemstelredamme up der Elf dusent maechden dach int jaer ons Heren M^o CCC^o neghen ende dortich.