Registers van de Hollandse grafelijkheid 1299-1345

Graaf Willem III doet uitspraak naar aanleiding van de dood van Jan van der Westkerke, waarbij hij de daders Gillis van Baarsdorp, heer Floris van Veere en Wouter en Jan van de Maalstede verschillende straffen oplegt en de partijen verzoent.

De bovenstaande datering is gebaseerd op de veronderstelling dat de paasstijl is toegepast. Zie de Inleiding.

De onderstaande tekst is gebaseerd op afschrift B.

Wi Willaem^c grave van Henegouwen^d, van Holland^e etc. maken cond allen luden^f dat dit es onse segghen alse van Jans doet van der Westkerke^g, zine maghe ende sine helpers an die ene zide ende an^h Gillisⁱ van Baersdorp^j, heren Florens van der Vere^k, Wouter ende Jan van der Maelstede^l ende horen helpers an die ander zide, daer si an beiden ziden op ons bleven sijn van hoghen ende van laghen ende van live ende van goede na ons goed dinken ende na der bester waerheyd die wire op vinden conden.

In den eersten so es onse segghen omme dat wi ter waerheid wel vonden hebben dat Gillis van Baersdorp een an leider was daer Jan van der Westkerken bi doet bleef, ende hi selve binnen vrede die eerste steke gaf, so sel Gillis^m van Baersdorp over die misdaet varen int lant van Chipersⁿ sonder nemmermeer te kerne^o, ende hi sal porren tvischen hier^p ende belooken Chinxchen^q die naest comd.

Vord want wi ter wareyd wel vonden hebben dat haer Florens van der Vere vraghede Gillis^r van Baersdorp alse hi hem vermaende joft buten vrede ware twichen hem ende Jan^s van der Westkerke, ende Gillis van Baersdorp die zeide dat buten vrede ware, zo es onse segghen dat haer Florens van der Vere^t, Wouter ende Jan van der Maelstede ende horen helpers aldus ghedane stucken doen sullen alse hier na ghescreven staet. Dats te wetene dat haer Florens van der Vere^u ende sine helpers^v voers. sullen stichten eene capelrie van dertich ponden Tornois^w sjaers, den groten Tornoysen^x voer sestien penninghe, in zekeren^y renten op vrie erve welc beset in die varssche^z van Scarpenesse, alse den abbet van Middelburch^a' sal dinken dat dese renten voers. wel beset es; ende dese capelrie sullen si stichten ter Westkerken binnen ^b' jaer naest comende voer Jans ziele van der Westkerken voernoemd. Ende die ghifte van dier^c' capelrie sal gheven Jans moder^d' van der Westkerke also langhe alse si levet, ende na hore doet so sal die ghifte gheven har Niclais^e' van Cats ende na hem sijn ouste wittachtich sone; ende en liete har Clais^f' van Cats ghenen wittachtighen sone na hem, so sal die ghifte gheven die ouste ende die naeste erfname van Jan^g' van der Westkerke die manhoeft es.

Vord segghen wi dat her Florens van der Vere^h', Wouter ende Jan van der Maelsteden alle drie varen sullen in bedevaerde tote sinte Jacops^i' in Galissien voer Jans siele van der Westkerken, ende si sullen porren dese bedevaerd te doene binnen den achte daghen na onser Vrouwen daghe tote uytgaende oeste^j' dat^k' naest comt.

Vord es onse segghen dat haer Jan van der Maelstede^l' varen sal legghen te ghisele te Medenblec tuschen hier ende beloken Paeschen^m' die naest comd, ende van danen en sal hi niet sceiden het en si bi onsen wille, omme die broke ende mesdaet die wi op hem te segghen hebben.

Vord es onse segghen dat haer Florens van der Vere^n', Wouter ende Jan van der Maelstede^o' ende hore hulpers ghelden sullen Janne van der Westkerke^p' dusend^q' pond suarter^r' Tornoisen^s', den groten voer XVI penninghe, dats te wetene vierwaerf neghentich pond ter maechsone^t' ende ter eerfsone^u' te drien tiden binden jare te betalen alsmen^v' soene pleghet te gheldene; ende die zes hondert ende viertich pond dier over bliven^w' die salmen betalen ten daghen voers. den ghoenen daer wijt op bewisen zullen, ende al dit ghelt voers. sullen si wel versekeren alsemen sone^x' pleghet te doene op zeker erve.

Vord so is onse segghen dat haer Florens^y' van der Vere^z' ende sine helpers voers. ons gheven sullen voer hore broke ende misdaet viere dusend lb. zuarter Tornoisen^a'' des voers. payments, te viere tiden te betaelnen, dat is te weten dusend lb. te Chinxchen^b'' die naest comd^c'', dusend pond tonser Vrouwen daghe te^d'' ute gaende oeste die daer na volghet, dusend pond tote sinte Martijns^e'' daghe in den winter^f'' daer na, ende dusend pond tote Vastellavent daer na comende^g''; ende willen dat hore ghemet lants ghelde ghemet ghemet ghelike gheliken horen vrienden, sonder verdrach. Ende hier of sullen si ons wel versekeren met borghen die ons ghenoeghen sullen.

Vord so segghen wi dat her Niclais^h'' van Cats zine maghe ende sine helpers ende alle Jans maghe van der Westkerken die binnen onsen lande gheseten sijn overmids dit soen dinc voerscreven hem al vertien^i'' sullen van alre claghe ende van allen eischen die tote den daghe van heiden^j'' ghesciet sijn, alse van Jans doet van der Westkerke nemmermeer in ghenen lande hier af meer te beclaghene^k''.

Vord so is onse segghen dat Jans erfnamen van der Westkerke ghelden sullen Jans smerte van Ernemude^l'' dertich pond zuarter Tornoisen^m'' des payments voers. ten eersten daghen uter soene. Ende hier bi so segghen wi tuschen den partien voers. eenen goede alinghe^n'' soene; ende so wie die dit soendinc verbrake, die hadde jeghens ons verbort lijf ende goed, sonder verdrach.

Ende omme dat wi willen dat alle lude weten dat onse segghen aldus gheseghet hebben alse hier voren staet bescreven, hebben wi in orkonde dese lettere bezeghelt met onsen zeghele. Ghedaen ende gheseghet bi ons ende bi onsen Rade in Middelburch^o'' des sonnendaghes voer Palmensonnendaghe int jaer ons Heren M CCC ende XVI.