Registers van de Hollandse grafelijkheid 1299-1345

Raas heer van Liedekerke en Breda, ridder, verkoopt al zijn leengoederen en heerlijkheden gelegen tussen Honte en Hinkele, die aan de grafelijkheid zouden toevallen wanneer hij zonder wettige zoon zou overlijden, voor 1200 pond Tournois aan graaf Willem III; de oorkonde wordt medebezegeld door zijn broers Filips van Liedekerke, heer van Ulvenhout, en Seger heer van Boelare, ridders.

De onderstaande tekst is gebaseerd op afschrift B.

Wi Rase here van Liedekerke ende van Breda, ridder, maken cond allen luden. Want wi wel bekennen dat al dat goed ende heerscippie tusken Honte^a ende Hinkelen dat wi in liene helden^b van enen hoghen prinche, onsen lieven here de grave Willaem^c van Henegouwen^d, van Holland^e etc., an^f hem of an sinen nacomelinghen van ons jof van onsen nacomelinghen toe comen soude ende besterven met allen rechte, waerd dat onser ghebrake sonder wittachtighen sone, so hebben wi bi onsen vrien wille, wel versien van^g sinne, ende bi rade van onsen vrienden ende ons Raeds, vercoft ende op ghedraghen onsen lieven here den grave voers. dese voerseyde heerscippie^h endeⁱ leen tusken Honte^j ende Hinkelen^k ende alt goed ende trecht dat wi daer hadden jof sculdich sien te hebbene, hoe so dat gheleghen jof^l ghehieten es, van gheestelike^m hand jof van waerliker hand roerende, eest tiende jof eyghen erve binnen dijcs jof manscipen ende bestorven goed ende ambochte, ende buten dijcs den Agghere ende anders al uuyt dijc, ane werp, zeedrift, tollen jof gheleedeⁿ op die Honte^o of op die Scelte, jof wisserien^p alse verre alse ons met den goede tuske Honte^q ende Hinkele toe behoren mochte jof behoren soude, mitten rechte binnen dijcs jof buten, waerd eyghen jof lene, omme twaelf hondert lb.^r Tornoyse, den groten Tornoys^s voer zestien^t penninghe gherekent, daer ons haer Pieter^u van Leyden, sijn rentemeyster van Zeland, ghenoech of ghedaen hevet, ende wi ons van hem wel ghepayt houden; ende weder roepen met desen brieve ende scelden quite alle machte van hantfesten ende van privileghen ende al recht of costhumen van allen lande dat ons of onsen nacomelinghen te baten comen mochte tyeghens onsen lieven here den grave voernoemd ende sinen nacomelinghen, alse van den cope van desen goede voers., ende hebben hem beloeft ende beloven in goeden trouwen alle handvesten ende privilegen die wi daer of hebben jof crighen jof vinden^v moghen hem of sinen ghewaerden bode in Zeeland^w te leveren of te sendene, die hem te deren of te bate comen mochte an dit goed voers.

Ende omme die mere versekerhede ende vastenesse van allen desen dinghen voers. bidden wi onsen ^x lieven broders haer Philips^y here van Wullen houte^z ende Zegher here van Bonlare^a', ridders, dat si alle dese stucken also alse si hier te voren ghescreven sien willen consenteren ende verwilcoren, ende desen letteren bezeghelen met ons.

Ende wi Philips^b' van Liedekerke, here van Wulvenhoute, ende Zegher here van Boenlare^c', broeders, omme die mere versekehede ende vastenesse van allen dien zaken voerscreven, dat si vaste ende seker bliven ghehouden, hebben wi met onsen lieven here ende broeder den here van Liedekerke ende Breda desen open brief bezeghelt met onsen zeghelen. Ghegheven int jaer ons Heren M CCC ende twaelfve op sinte Martijns daghe in den winter.