Registers van de Hollandse grafelijkheid 1299-1345

Graaf Willem III benoemt Elwoud van den Schore tot dijkgraaf in het nieuwe land te Sint-Maartensdijk, regelt diens bevoegdheden, en stelt de boeten vast bij overtredingen tegen de dijkgraaf en de door deze aangestelde gezworenen.

De onderstaande tekst is gebaseerd op afschrift B.

Wi Willaem^a grave van Heynnegouwen^b etc. maken cond allen luden dat wi bi onsen Rade bevolen hebbe ende bevelen met desen brieve Elcwoude^c van den Score onse dijcgravescip^d van den niewelande^e dat in Sente Martijns^f dike^g bediket es te bedriven ende te verwaren^h tonser eeren ende toit ons lands oirbair; ende gheven hem macht ghesuoeren te maken ende die of ende an te doene alst hem oirbair denken zal, ende ghebot te legghen op dike, sluse, wateringhen ende hereweghenⁱ, gheld dair in te legghen ende dat weder in te panden vierscat bi den ghesuoeren na den rechte van onsen lande.

Wie in sinen ban vernacht, die es sculdich drie scellinghe; dier XIIII nacht in es, neghen scellinghe; ene maent, XVIII s.; zes weken, XXVII s. So wien^j die dijcgrave berijd, es sculdich III^k lb. Zo^l wie die ghesuoeren weder seyde^m, sal gheven elken ghesuoeren XX s. also menich alser tyeghenwoirdich es, ende den dijcgrave also vele als den ghesuoeren, ende den grave also vele alse beyde den dijcgrave ende den ghesuoerenⁿ. Wie twiste maect in sinen ommeghanc, die zalt beteren vierscat^o, ende hi zal verboren also vele of^p hi die ghesuoeren weder seyde. Voirt so wair die dijcgrave sijn ghelt in yemans dike leghet, dat zal die dijcgrave inpanden an siere haven vierscat alse recht es^q; ende en vonde hi ^r ghene have te panden, so soude hi des mans land beriden ende eyghenen^s ghelike of wijt selve deden^t. Ende so wair ons of onsen dijcgrave voirs. enich recht verscint ende die dijcgrave ende die ghesuoeren niet en weten an wien ment houden mach^u, dair zal comen die scoutate van der dricht ende wisen bi namen ende bi toe namen oft land wairt gheleghen es; ende en dede hijs niet, so zalt die dijcgrave houden an den scoutete ghelike joft van hem zelven toe quame. Wie den dijcgrave voirs.^v met ghewelde keerde ende sine ghesuoeren op sinen ommeghanc, die zal verboren jeghens den dijcgrave dertich pond, tyeghens den ghesuoeren dertich pond, ende jeghens ons also vele alse beyde^w tyeghens den dijcgrave ende den ghesuoeren. Wilc tijd die dijcgrave sine ghesuoeren ombiet omme tslands oirbair, wie dat dair niet en comet hem en lette sin^x, hi verbuyerde^y twintich scellinghe. So wad gheld die dijcgrave bi den ghesuoeren omme vrese tslands uyt legt^z, dair of zullen wi hem^a' scadeloes houden.

^b' Omme dat dit es een^c' nieweland ende wel toe siens behoeft also verre als die lude hem ghemenliken setten^d' wel te diken ende dat land narenstelike te behouden, so willen wi dat dese pointe voirscreven die dijcgrave voirs. zal moghen lichten ende zuaren bi sinen ghesuoeren alst hem god^e' denken zal toit tslands oibair. Voirt bevelen wi hem vrede te nemen over al^f' in sine dijcgravescip voirs. Ende wair yemand die hem hier in weder stonde jof lette dede, dien zouden wijt also doen ontghelden dats hem een ander hoeden soude; ende ghebieden allen onsen goeden luden dat si hem hier in starken ende helpen ghelike ons zelven. Dit zal gheduren tonsen weder seghen toe.

In oirkonde ^g' etc. Ghegheven te Reymerswale op sente Andries dach int jaer ons Heren M^o CCC^o een ende twintich.