Registers van de Hollandse grafelijkheid 1299-1345

Graaf Willem III verpacht aan vrouw Agnes, vrouwe van Haamstede, de voogdij over de kinderen van heer Witte van Haamstede en al nader omschreven diens goederen, voor de duur van twee jaar, verrekent met haar wederzijdse schulden, en draagt haar de helft op van de inkomsten in het dorp Brouwershaven, alles onder zekere bepalingen.

Zie ook nrs. ZE 136 en 137.

De onderstaande tekst is gebaseerd op afschrift B.

Wi Willaem^a grave van Heynnegouwen^{b c} etc. maken cond allen luden dat wi veren Agnesen^d, der vrouwen van Haemsteden, te pachte ghegheven hebben van nu een^e Jaersdaghe naist comende twie^f jaer dair na durende onse voghedie van sheren Witten kinder van Haemstede ende al tgoed dat heren Witten toe behoirde, hoe ende in wat manieren dat gheleghen es, dats te wetene die helfte van sBrouwers havene^g, tambocht in Duveland ende tambocht in^h Haemsteden ende elwair inⁱ Scouden dairt gheleghen es, ende tiende, land, molen, viskerien, duyn pacht^j est van haymannen^k of van dalen, ende al ander goed dat den kinderen toe behoirt, omme neghen hondert pond Tornois^l vries ghelts, den groeten over zestien penninghe gherekent, te betailen onsen rentemester van Zeeland vriliken tonser behoef, van desen ersten jaer een verendeel tote sente Jacobs^m dagheⁿ naist comende, een^o verendeel tote sente Martijns^p daghe in den winter^q, een verendeel toit onser Vrouwen lijchtmisse^r ende^s een verendeel toit uytghaende meye dair na naist comende, ende ^t des ghelike te betailen van den anderen jare. Voirt hevet onse rentemeester van Zeeland hoir ghelevert in achterstalre scoud van den oiste^u die nu gheleden es, ende anders van enghienen achterstalle, elf hondert ende vijchtich pond, die si van onsen weghen in nemen zal. Hier of slaet si van hare lijftocht die onse rentemeester ontfaen hevet ende van hare kinder houdinghe die wi sculdich sien te ghelden vijf^v hondert pond; item slaet si of die si ons ghelient hevet in reden ghelde vier hondert pond; dus blivet si ons sculdich van achterstalle twie^w hondert pond ende vijftich pond, die si ons betailen sal binnen meye naist comende. Voird hebben wi hoir bevolen onse helfte van den bedrive van den dorp van Brouwershavene^x, in deser manieren dat si toit Brouwers havene niemant dat bedrijf bevelen en zal ten sie bi onsen wille, ende dat si noch in Duvelant^y noch tote Haemstede^z noch elwair in Scouden niemand enich bedrijf^a' jof amboch jof gheleyt van luden bevelen^b' zal, hi ne si van onser sonderlangher vrienscap ende jonste; ende so wad van onser helfte van Brouwershavene^c' voirseyd verscint^d', dair zal si ons goede rekeninghe of doen, ende onse lude^e' helpen dat si ons deel van onser renten ende onse wintmolen^f' tote Brouwers havene, die ons alene es, ende anders onse renten ende verval in den lande tote onsen scoensten ghebruken, ende onsen boden helpen ende starken met goeder trouwen dat si die zeedricht^g', so wair hi^h' verscint achter Scouden, tonser^i' behoef vrieliken ghebruken. Ende wair dat sake dat binnen desen termine enighe bede jof herevaird jof anders scoenesse van ambochte verscene, dair soude si ons of doen ghelike anders onsen mannen. Ende si en zal ons van desen neghen hondert ponden syaers voirscreven enghenen ofslach rekenen, noch van lijchtochte^j' noch van hoir kinder houdinghe noch van anders en ghenen^k' coste; mair wair dat sake dattet^l' land besoute van vloeden, dair souden wi hoir alsulc goed of doen ende verset als moghelijc wair. Ende si zal onsen rentemester van Zeeland alle voirwairden voirscreven versekeren binnen Zeerixee^m' eer si hoir hand an enich goed slaet, also dat hem dunct dat wier wel an versekert sien. Ende so wat pachte of hure^n' die onse boden ghemaect hebben, die zullen^o' ghestade bliven. Voirt tenden desen pacht so zal ons jof onsen boden ver Agniese^p' voirseyd jof hoir arfnamen al dit goed voirnoemd vriliken weder op leveren voir die scout die ons hair Witte sculdich blef in sinen lesten live, ons ende onsen boden vrieliken te ghebruken^q', jof zi zal ons gheven neghen hondert pond Tornois^r' sjaers, payements voirs. ende tote zulken daghen alse voirscreven es, wilc hair wi liever hebben ter tijd toe dat wi onse scout in hebben die ons hair Witte voirs. sculdich blef. Ende alle dinghe ende voirwairden voirscreven sonder^s' archlist.

In oirkonde desen brieve bezeghelt mit onsen zeghele^t'. Ghegheven tote Zeerixee^u' op sente Stephaens dach int jaer ons Heren M CCC een ende twintich.