Registers van de Hollandse grafelijkheid 1299-1345

Graaf Willem III benoemt Nicolaas Stormsz. van den Waarde tot dijkgraaf tussen Honte en Hinkele, en stelt bepalingen vast betreffende de uitoefening van het ambt en de te heffen boeten.

Wi Willaem grave van Heynnegouwen^{a b} etc. maken cond allen luden dat wi Clays^c Storms sone van den Waerde bevolen hebben ende bevelen mit desen brieve onse dijcgravescip tuysken Honte ende Hinkle^d te bedriven ende te verwarne toit onser^e eren ende tote ons lands oerbaer, ghesuoerne te maken ende die of ende an te doene alst hem orbaer denct, kueren ende ghebot te legghen op dike, op inseten^f, op slusen, op wateringhen ende op hereweghe, ghelt daer in te legghen ende dat weder te pande vierscat bi den ghesuoernen.

Wie in sinen banne vernacht, die es sculdich drie scellinghe; diere viertien nachte in es, neghen scellinghe; ene maent achtien scellinghe; ses weken zeven ende twintich scellinghe.

So wie die dijcgrave berijd^g, es sculdich drie pond.

Wie die ghesuoerne wederseyde, es sculdich elken ghesuoerne twintich scellinghe also menich alser tyeghenwordich es, ende den dijcgrave also vele als den ghesuoernen, ende ons also vele als beyde den dijcgrave ende den ghesuoerne.

Wie twiste mackede in sinen omneghanc^h, die salt beteren twiscatⁱ ende hi sal verboren also vele of hi die ghesuoerne wederseyde.

Voert so waer die dijcgrave sijn ghelt in yemans dike leghet, dat ghelt sal die dijcgrave in panden an siere haven vierscat alse recht es; ende en vonde hi en ghene have te panden, so soude hi des mans land beriden ende eyghen ghelike^j jof wijt selve deden.

Ende so waer ons jof onsen dijcgrave voers. enich recht verscint ende die^k dijcgrave ende die ghesuoerne niet en weten ane wien ment^l houden mach, daer sal comen die dijcgrave van der drift ende wisen bi namen ende bi toenamen joft land so waert gheleghen es; ende ^m en dede hijs niet, so salt die dijcgrave houden an den scoutate ghelike jofⁿ van hem selven toe quame.

Wie den dijcgrave mit ghewelde keerde ende sine ghesuoeren op sinen ommeghanc, die sal verboren tyeghen den dijcgrave dertich pond ende^o tyeghens ^p den ghesuoeren XXX lb., ende tyeghens ons also vele als tyeghens den dijcgrave ende den ghesuoernen beyde.

Wilc tijd die dijcgrave sine ghesuoeren ombiet omme slands orbaer, wie dat daer niet en comet^q hem en lette sin, hi verboirt twintich scellinghe.

So wad ghelde die dijcgrave bi den ghesuoeren omme vrese slands uyt leghet, daer^r of sullen wi hem scadeloes houden.

Wie hem vrede wederseyde, die verboirde tyeghens ons dertich pond Tornoyse^s ende tyeghens hem ende sine ghesuoerne dertich pond Tornoyse^t.

Voert gheven wi hem machte enen anderen^u in sine stede te setten die dijcgravescip te bedriven ghelike hem selven, als hijs selve niet doen en mach; ende bevelen hem dat hi beneme dat niement ghenen dari en^v slae binnen siere^{w x} dijcgravescip anders dan die kuere hout.

Ende omme dat onse ghemene manne tuysken Honte ende Hinkelen alle dese voirscreven pointe ghewilcoirt hebben, jof dat si ons mit vonnesse toe ghewist^y sien, zo willen wise ghestade houden. Ende ghebieden allen onsen goeden luden dat si hem ghehulpich, gheradich ende ghehorich sien also lief als so onse^z vrienscip hebben; ende die des niet endede, wi soudent also ^a' op hem verhalen dats hem een ander hoeden soude. Dit sal gheduren toit onsen wedersegghen.

Ghegheven in Middelburch^b' des donresdaghes na Paeschdach int jaer ons Heren M CCC drie ende twintich.