Registers van de Hollandse grafelijkheid 1299-1345

Graaf Willem III verklaart hoe ten overstaan van hem in de (hoge) vierschaar te Middelburg Hugo Pijl met behulp van drie met name genoemde edele verwanten heeft aangetoond dat hij volledig edel is en niet slechts half, zoals hem ten laste werd gelegd door Gerard Schoutenz. en Wisse Gerardsz. van Wemeldinge.

De bovenstaande datering is gebaseerd op de veronderstelling dat de paasstijl is toegepast. Zie de Inleiding.

Wi ..Willaem^a grave van Heynnegouwen^b etc. maken cond etc. dat Ghered^c Scouteten sone ende Wisse Ghereds^d sone van Wemeldinghen voir ons quamen in Middelburch^e in onse vierscare ende ontseyde Hughe Pijl die ene helfte van zire boerten, ende dat soude roeren van zire moeder weghen. Hughe Pijl seyde daer jeghens ende begheerde sine coemste te brenghen als hi sculdich waer. Dat quam onder vondnes, ende tvondnes wijsde dat hi met drien edelen mannen die zine vormeknie waren in elken vierendeel daer zi zine maghe alsoe na in waren hem brenghen mochten een vierendeel coemsten. Daer quamen Willaem^f Hoet^g van den Score, Olivier Papen sone ute Loedijc ende Gillijs van Cleve ute Duvenee, ende wilden hem brenghen een vierendeel^h coemsten van veren Immezoetenⁱ weghen, Hughe Pijls moeder moeder^j. Zi werden ^k wederseyd dat zi hem zoe na maech niet en waren; ende ward in die waerhede ghedinghet die waerhede en kenneder niet of. Daer na quamt onder vondnes, ende vondnes wijsde dat dese drie voirscreven Willaem^l, Olivier ende Gillijs met horen eede sterken souden dat zi him alsoe na maghe waren van rechter boerd van veren Immezoeten^m weghen voirscreven, dat zi hem met rechte een vierendeel coemsten brenghen mochten. Ende desen eed deden zi voir ons, ende Willaemⁿ Jans sone ute Duveland^o stavede^p hem dien eed bi rechte ende bi vondnesse.

In oirkonde etc. Ghegheven in Middelburch^q op den Witten donresdach int jaer ons Heren M^o CCC^o drie ende twintich.