Registers van de Hollandse grafelijkheid 1299-1345

Graaf Willem III schenkt Hugo zoon van heer Jan van Kruiningen ter bekostiging van diens studie een jaargeld van 30 pond zwarten Tournois, uit te keren door de rentmeester van Bewesten Schelde.

Wi Willaem^d grave van Henegouwen^e, van Holland^f, van Zeeland ende here Vriezeland^g maken cond allen luden dat wi Hughen haren Jans sone van^h Cruninghen ghegheven hebben ende gheven omme Gode ende ommen haren Jans dienst wille voirseyt toit sire leeringhe te helpe elcs jaers dertich pond suarte Tornoyseⁱ also langhe als hi leret^j, ter tijd toe dat wien anders versien hebben jof daer toe gheholpen dat hi versien worde van gheesteliken goede; ende dit ghelt sel hi ontfaen jaerlix van onsen rentemeister bi Wester Sceld^k in Zeeland toit elken sente Jans misse te midde zomer^l. Ende ombieden onsen rentemeyster die nu es jof hier namaels wesen sel dat hi Hughen voirseyt dese voirscrevene rente jaerlix betaile ten terminen voirscreven sonder ander^m ghebod van ons te hebben, ter tijd toe dat wien anders versien hebben; ende daer ofⁿ neme jaerlix ene quitansie van him onder sinen zeghel, ende van alzoe vele sullen wi quiten onsen rentemeyster voirseyt med dien brieve in sire eerster rekeninghe^o.

In orkonde desen brieve besegheld med onsen zeghel^p. Ghegheven in Middelburch^q des anders daghes na sente Odulfs^r daghe int jaer ons Heren dusent driehondert vijf ende twintich^s.