Registers van de Hollandse grafelijkheid 1299-1345

Graaf Willem III bepaalt dat het klooster Bethlehem, dat tot armoede is vervallen, niet meer dan dertig inwoners mag hebben, en verzoekt de abt van Ter Doest dit te willen bevestigen.

Wi Willaem^a grave van Heynnegouwen^b, van Holland^c, van Zeelant ende here van Vrieselant^d maken kond allen luden^e. Want wi anezien den groten cost ende den commer die dat cloester van Bellem langhe tijt ghehat heeft, so sien wi met onsen ghemenen Rade over een ghedraghen ende willen dat si van desen daghe voirwaerd niet meer persone en zullen hebben in horen cloyster danne dertich. Ende ombieden der abedissen van Bellen^f die nu es jof hier na wesen zal dat si nimmermeer meer persone en ontfaen, noch om onser bede willen noch om niemant anders bede willen, boven dertich persone; ende es dat sake datter meer es^g teser tijd in den cloyster, zo willen wi dat si die laten sterven ende niemant en ontfaen voir die tijd datter min dan^h dertich personen zien in den cloyster. Ende bidden den abt van der Does dat hi dit ghehenghen wille ende confermeren alse datter onder nonnen, scoelekinderⁱ ende broeder maer dertich persone en sien die dair in den cloyster gheprovent^j sien.

In oirkonde etc. Ghegheven tote Zerixe^k des manendaghes na Beloken Paysken int jaer ons Heren M CCC zeven ende twintich.