Registers van de Hollandse grafelijkheid 1299-1345

Graaf Willem III stelt Jan Wissenz. van Duiveland in het bezit van diverse nader omschreven goederen en rechten in het ambacht Westkerke (Tholen) die de graaf voorheen waren aangekomen van heer Gerard de bastaard van Holland, en die de graaf nadien had verocht aan zijn kamerling Willem van Duivenvoorde, door wie zij hem ten behoeve van Jan Wissenz. waren opgedragen.

Vgl. nrs. ZE 461 en 466.

Wi Willaem^a grave ^b etc. maken cond allen luden dat voir ons quam Willaem^c van Duvenvoirde, onse trouwe camerlinc, ende droch ons op tote Jan Wisen^d soens behoef van^e Duvenland^f alsulc ambocht metten huse ende metter hofstede dair thuys op staet ende die ten huse voirs. behoirt, met molen ende met allen dien^g rechte^h dat ten ambochte toe behoirt, dat hi van ons helt ten rechten lene, ende jeghens sestien ghemete tienden luttel mijn ofte meer legghende int ambocht ter Westkerkenⁱ, die ons ane ghecomen waren van heren Gherarde^j den bastaert van Holland^k, die in pachte te houden van dien ghenen darmense met enen rechte sculdich es of te houden in allen ^l manieren alst hair comen es. Voirt droch hi ons op tote Jan Wissen soens behoef voirs. jeghens zes ende dertich ghemete lands luttel mijn ofte meer legghende binnen den ambochte ter Westkerken^m ende ons anecomen waren van heren Gherardeⁿ voirs., die Jan voirs. erflike besitten zal. Wilc ambocht, tienden, molen, land ende alle goed voirscreven also alst ons anecomen was van heren Gherarde^o voirs. ende Willaem^p van Duvenvorde^q jeghens ons ghecoft hadde ende weder op ghedreghen tote Jans behoef, wi verliet hebben ende verlien Janne Wissen sone voirscreven van ons te houden in sulker manieren als onse opene brief hout dair dese brief doer ghesteken es, daert Willaem^r mede van ons helt; des wi hem een recht warende wesen zullen, sonder alrehande achlist.

In orkonde etc. Ghegheven tote Berghen^s in Heynnegouwen^t des dinxendaghes na sente Laurens dach int jaer ons Heren M CCC XXVII^o.