Registers van de Hollandse grafelijkheid 1299-1345

Willem Bollard, parochiepriester van de Meeneweide, en schepenen aldaar verklaren dat heer Pieter van Leiden, rentmeester van Zeeland, namens graaf (Willem III) ten overstaan van hen en andere goede lieden goederen ter plaatse kwam kopen van heer Arnoud van Haalbeke, ridder, maar dat hij ondanks de gemaakte afspraak geen overeenstemming over de prijs kon bereiken met de gezant van heer Arnoud, die geen geloofsbrieven kon overleggen en ook geen kwitantie wilde geven, en dat heer Pieter uiteindelijk het geld onder hun hoede heeft achtergelaten.

Wi Willaem^a Bollard^b prochypape ter^c Meenreweyde, Jan Boudijns sone, Wijcman Wissen sone, Erembout Margareten^d sone, Pieter Tarninx sone ende Doedijn Danken^e sone ende Hughe Scutemans sone, scepen ter selver stede, maken cond allen luden dat hair Pieter van Leyden, rentemeyster van Zeeland, quam in die Meneweyde^f in sente Pieters daghe te inghaende^g ochste voir ons ende voir anders goede luden, ende boet van ons heren sgraven weghen van Heynnegouwen^h ende van Hollandⁱ alsulken coep te voldoene ende te betalen mit ghereden ghelde alse ghesproken was tuischen onsen here den grave voirs. ende heren Arnoude van Haelbeke, ridder, als van der Meenreweyde^j, ende dede dat ghelt ons tellen in groeten Tornoyse^k ende in florinen toit seven hondert ende vijftich pond toe, enen groeten Tornoyse^l over achtien^m penninghe gherekent; ende die rentemeyster voirs. was dair boven bereit ende boet: wair dat sake dat die ghene die over dienⁿ coep waren dair Jan Wissen sone dien^o coep makede van dien voirs. goede, kenneden dat dit beter payment of meere^p wesen soude, dat wilde hi mede voldoen ende betailen heren Arnoude voirs. of sinen ghewarden bode, also verre als hair Arnoud voirs. jof sijn ghewarde bode hadden willen gheven den rentemeyster kennesse ende brieve van heren Arnoude als dat si dat ghelt ontfanghen hadden ende hem voldaen waer van den goede an der Meenreweyde. Ende hier toe quam Jan van Leen houte ende seyde datten hair Arnoud^q sijn here dair ghesent hadde om achte hondert pond, enen groeten coninx Tornoyse^r over sestien penninghe ^s, tontfane of half den lecscat te selver stede, mair en ghene brieve van dat hi ghewart bode wesen soude van heren Arnoude sone^t brochte hi, noch en wilde ghewaerscip doen van den ghelde dat hi ontfenghe jof van den goede quite te scelden; ende seyde dat hem anders niet van sinen here bevolen was. Ende omme dat die rentemeyster hem ghenoch doen wilde, so hevet hi dit voirs. ghelt ghelaten ter Meenreweyde^u onder Jan^v Boudijns sone bi onsen rade, toter tijd dat hi ons heren sgraven wille hier of weet jof dat hair Arnoud^w jof sijn ghewaerde bode ghenoch doen willen in manieren als voirscreven es.

Ende omme dat wi dit kennen, zo hebben wi desen brief bezeghelt mit onsen seghelen. Ghegheven in sente Pieters daghe voirs. ter Meenreweyden^x int jaer ons Heren M CCC ende neghene.