Registers van de Hollandse grafelijkheid 1299-1345

Schepenen van Zierikzee verklaren dat ten overstaan van hen in de kerk van Borrendamme een aantal met name genoemde personen heeft verklaard dat zij geheel voldaan zijn van het geld dat hun in een grafelijke uitspraak was toegewezen in verband met de zoen betreffende de dood van Hendrik Domaasz. en Muloc Filipsz., welk geld zij beloven te verdelen onder de rechthebbenden, en dat zij Willem zoon van Jan Lam Lievenz. en diens verwanten en helpers kwijtschelden van alle onderpand.

Vgl. het voorafgaande nr. ZE 548.

Wi Witte Willemans sone, Hughe Prijs Jans sone, Costijn Claeuwarts^a sone, Damaes^b Michiels^c sone, Symon Hughe Pris^d sone ende Waddijn Heynrix^e sone, scepen in Zeerixee^f, orkonden ende kennen mit deser lettere bezegheld mid onsen zeghele ^g dat voir ons quamen in die kerke te Bordendamme, dair ons die rentemeyster mit hem ghebeden hadde te wesen, Jan ver Soeten sone voir siere moeder ende voir hem, Hobuyc^h Domaesⁱ sone, Hughe Domaes^j sone, Wilfart^k Katelinen sone voir siere moeder, Willaem^l Wissen sone voir sijn wijf ende hare kindre, Dieric veren Achten^m f.ⁿ voir sijn wijf ende hare kindre, Gheyle Mulox mit Dankart^o Hughen sone haren ghecoren vocht^p voir hair selven ende voir hair kindre, Lammijn Heynen sone voir sijn kint, Wisse Prijs sone voir sijn wijf ende hare kindere, ende verlieden dat hem van Heynric Domaes soens ende Muloc Philips soens doit die erfsoene ende die machzoene, also groet als ons heren sgraven segghen dair of was, van den ersten daghe, van den middelsten ende van den lesten daghe vol ende al verghouden is; ende elkerlike voirscreven hevet beloft voir ons dese zoene ende tghelt voirscreven te brenghen onder dien^q ghenen dart van rechte sculdich es onder te comen, sient vrouwen sient kindre, also dats onse here die grave ende Willaem^r Jan Lam^s Lievens soens sone ende sine maghe ende sine helpers dair an behouden ende bewart sien. Ende dese sekerhede ontfenc voir ons Gherard^t Alewijns sone, rentemeyster van Zeeland; ende hier bi hebben Jan veren Soeten^u sone ende al die ander voirscreven voir ons quite ghescoude alle panden, wedden ende borghen die Willaem^v Jans sone voirs. ende sine maghe ende sine helpers voirs. gheset hadden voir dese twe doitslaghe voirscreven.

Ghegheven in Zeerixee^w des manendaghes na sente Jans daghe te middezomer int jaer ons Heren^x M CCC ende zeventiende.