Registers van de Hollandse grafelijkheid 1299-1345

Graaf Willem III verleent Jan heer Jansz. van Sabbinge de 4 gemet tienden in Sabbinge en Westkerke die aan deze waren verkocht door Willem Jansz. van Schengen uit de 12 gemet die deze daar houdt; de resterende 8 gemet verpacht hij aan Willem voor 3 schelling Hollands per jaar.

Vgl. het volgende nr. ZE 560 alsmede nrs. ZE 615 en 616.

Wi Willaem^a grave etc. maken cond etc. Want Willaem^b Jans sone van Scenghe voir ons quam ende verliede dat hi van sinen twalf ghemete tienden, legghende in Sabbinghe ende in Westkerke^c d in Wlfarts dijc^e, vercoft hadde^f alse verre alst onse wille ware Janne heren Jans f.^g van Sabbinghe vier ghemete tienden in deelinghe van den tiende voirscreven, ende hi ons dair of sine opene brieve of op ghelevert heeft, so hebben wi Willaem^h voirs. gracie ghedaen alse dat wi Janne voirscreven die vier mete ⁱ verlied hebben ende die ander achte mete tienden verlien wi Willaem^j voirscreven mid desen brieve, behouden elken anderen sijns rechts, van ons te houden ende te besitten^k in allen manieren als die^l brief houd die bi wilcore van ons ende van onsen mannen van Zeeland^m dairof ghemact ende bezeghelt es; ende hier of zal hi ons jaerlix te pachte gheven drie scellinghe Hollandsⁿ.

In orkonde etc. Ghegheven in Middelburch^o des donresdaghes na sente Thybursius^p daghe int jaer XXXI^o.