Registers van de Hollandse grafelijkheid 1299-1345

Graaf Willem III bepaalt de bedragen die de goede lieden van Wieldrecht en Twintighoeven hem voor de overmaat zullen betalen voor het land aan de ene zijde van de weg die door die ambachten loopt, en dat hij over de wildernis aan de andere zijde later uitspraak zal doen.

De onderstaande tekst is gebaseerd op afschrift B.

Wi Willaem^b grave van Henegouwen^c, van Holland^d etc. maken kond allen luden. Wand onse goede lude van Wildrecht ende van Twintichhoeve^e an ons ghebleven waren ende noch an ons ghebleven sien onse segghen te houdene van der overmaten^f die ons vervallen es ende verscenen in den ambochten van Wildrecht ende van Twintichoven^g voerseyd, waer of dat onse zegghen^h es in der maniren als hier na bescreven staet. In den eersten so es onse segghen also dat die van den ambocht van Wildrecht ons gheven zullen van elker morghen lands die ons verscenen is van der overmaten beneden den weghen die nu ter wilen gaet doir den ambochte voers. XL s. Hollandsⁱ, ende die van den ambochte van Twintichoven^j sullen ons gheven van elker morghen lands die ons verscenen es van der overmaten beneden den weghe die nu ter wilen gaet doir den ambochte voerseyd XXX s. Hollands^k; ende van desen ghelde so sullen si ons gheven ende betalen jof onsen rentemeyster van Zuytholland^l, soe wie dat hi es, van onsen weghen die ene helfte in sinte Pieters daghe in selle^m die nu naest comet ende die ander helfte in sinte Martijnsⁿ daghe in den winter^o die daer naist toe comende es. Voird alse van der wilderd die gheleghen es boven den weghe in beyden ambochten van Wildrecht ende van Twintichoeven voeseyd^p also alset daer gheleghen es, dat houden wi voerd toet onsen verclaersene ende up onse segghene an^q ons toet der wilen dat wijs te rade werden^r.

In orkonde desen brieve etc. Ghegheven tote Dordrecht^s des woensdaghes na sinte Pieters daghe inghaende oechst int jaer ons Heren^t M CCC een ende twintich.