Registers van de Hollandse grafelijkheid 1299-1345

Graaf Willem III geeft op verzoek van zijn broer heer Jan van Henegouwen, heer van Beaumont, aan de poorters van Schoonhoven enkele vrijheden betreffende tol, schot en rechtspraak.

De onderstaande tekst is gebaseerd op afschrift B.

Wi Willaem^b grave van Henegouwen^c, van Holland^d etc. maken cond allen luden dat wi om bede ende versoeke van onsen lieven broeder heren Janne van Henegouwen^e, here van Byamond^f, ghegheven hebben sinen poirters wonende binnen der poirte van Scoenhoven al sulke vrihede als hier na ghescreven staet.

In den eersten dat si tollen vri varen voir al onse tollen van onsen gravescip van Holland^g ende alse vry te wesen alse anders onse vrye steden, ende nerghent scot te gheven van horen goede dan binnen Scoenhoven also verre als si hoir poirtrecht houden alse recht es, uyt gheset onse oude bede ende onse oude scoet dat wi van ouden ghehat hebben.

Voirt wat scepenen wisen van Scoenhoven, recht tewesen binnen Scoenhoven; ende wat vonnesse des si niet vroet en sien, dat zullen zi halen Tordrecht^h.

Voird soe wie vrede breket die binnen Scoenhoven ghenomen es, die zalt beteren met sinen live ende met sinen goede also verre als hi dair of verwonnen word met scepenen jof met twien wittachtighen poirters van ghetrouwen bedde, elc tote tien ponden ghegoed jof dair boven; ende die vrede zalmen houden alse wide alse die zonne op ende toe ghaet.

Voirt nerghent te recht te staen dan binnen vrien stedenⁱ, het en si dat si hem verwilcoren voir enighen ghewaerden rechtere ende voir zeven buren jof voir scepenen; jof dat si erghent mesdaden ende mense metter verscher daet begrepe, dat souden si beetren alse dair recht ware dair si mesdeden.

Alle stucken voerscreven  sonder alre hande arghede, ende behouden onser heerlichede ende onser graveliker ghewelt.

Ende omme dat wi^j willen dat alle dese stucken voirscreven wel ende vast, zeker ende ghestade ghehouden bliven van ons ende van onsen nacomelinghen hem ende horen nacomelinghen, hebben wi desen brief doen bezeghelen met onsen groeten zeghele uuthanghende. Ghegheven inden Haghe des dinxendaghes na meye dach int jaer ons Heren M^o CCC^o twie ende twintich.