Registers van de Hollandse grafelijkheid 1299-1345

Graaf Willem III staat zijn deurwachter Jan Plaistrier toe zijn huis naast het tolhuis te Dordrecht te bewonen, en bepaalt dat hij hem de gemaakte onkosten tot onderhoud van het huis zal vergoeden.

De onderstaande tekst is gebaseerd op afschrift B.

Wi Willaem^a grave van Henegouwen^b, van Holland^c etc. maken cond allen luden dat wi Jan Playstrier^d onse doirwaerdere ghelient hebben ende lienen tote onsen weder segghen onse huys dair Marie van Oistburch in plach te wonen tyeghens onse tollen huys van Dordrecht^e, in te wonen ende in te bliven tote onsen wedersegghen. Ende waer dat zake dat Jan Playstrier ane dit voerseyde huys tymmerde jof cost an leyde omme thuys te beterne, dat zullen wi hem betalen ende weder gheven opt segghen van twien goeden luden die wiere toe nemen zullen, die die timmerringhe^f ende den cost versien zullen in goeden trouwen; ende alsulc ghelt alse Plaistrier^g voernoemd an dit huys voers. zal hebben gheleyd alse verre alse die twie manne die wiere toe nemen zegghen zullen, dat zullen wi hem betailen eer^h wien ute den huse voescrevenⁱ doen; zonder arghenlist.

In oirkonde desen brieve etc. ^j Ghegheven Tordrecht^k des manendaghes na Paesdaghe int jaer ons Heren dusent drie hondert twie ende twintich.