Registers van de Hollandse grafelijkheid 1299-1345

Graaf Willem III vergunt Willem van Horn dat de lieden van het land van Altena een nieuwe sluis in de Maasdam mogen leggen, even groot als de oude.

De onderstaande tekst is gebaseerd op afschrift B.

Wi Willaem^a grave van Henegouwen^b, van Holland^c etc. maken cond etc. dat wi Willame van Hoirne ^d al dustanighe gratie ghedaen hebben, behouden ons onser scouwen ende ons rechts, dat die van den lande van Altena maken zullen eene niewe sluse in den Maesdamme daerse onse hiemradere wisen^e, van diere groete, van diere wide ende van diere diepen^f dat die oude sluse was. Ende dese gratie van deser niewer slusen en sal niet langher gheduren^g dan onsen hienraderen^h goed dinket bi horen eede datter onse land bi verzekert es; ende binnen deser tijd dat dese niewe sluse gheduren mach, sone zullen wi noch onse land den goeden lieden uten lande van Altena niet eyschen moghen enighe sluse meere te maken jof waterslope van slusen. Ende wilke tijd dat dese niewe sluse uyt ghewiset woirt van onsen hiemraden, so zullen wi ende onse land bliven in allen rechte alse wi te voren waren ere dese brief ghemact was, ende die goede lude uten lande van Altena in den horen, behouden altois onser scouwen ende ons lands zekerhede, sonder allen arghenlist.

In oirconden hebben wi desen brief bezeghelt met onsen zeghele. Ghegheven tote sinte Gheerden berghe des vridaghes na sinte ⁱ Bartholomeus^j dach int jaer ons Heren^k dusen drie hondert twie ende twintich.