Registers van de Hollandse grafelijkheid 1299-1345

Graaf Willem III schenkt heer Willem, graaf van Gulik, die getrouwd is met zijn dochter Johanna, een aantal nader omschreven inkomsten en pachtgoederen in Zuidholland ter waarde van 1000 pond Tournois per jaar, in mindering op de medegave die hem in het huwelijksverdrag was beloofd.

Cf nr. ZH 334.

Wi Willaem^a grave van Heynnegouwen^b, van Holland^c, van Zeeland ende here van Vriesland^d maken cond allen luden dat wi enen hoghen man ende moghende, onsen lieven sone^e heren Willame^f grave van Ghulijc, in ofslaghe van sulker medeghave ende bewisinghen als wi him beloift^g hadden in huweliken goide met veren Janne sinen wive, onser dochter, bewijst hebben ene^h somme van onsen renten ende goede toite dusent ponden Tornoyseⁱ sjaers, den ouden groeten^j koninx^k Tornois^l over sestien penninghe gherekent, die gheleghen sien in onsen lande van Zuytholland^m, te houdene ende te besittene na alre voirme ende maniere dat die brieve ende handvesten houden die ghemaect sien van dien huwelijc twischen herenⁿ Willame^o grave van Ghulijc ende veren Jannen sinen wive, onser dochter voirscreven, wair of die particulen van der bewisinghe van desen dusend ponden jaerlix vorscreven hier na volghen. In den ersten ane onsen tynse in Tiesselijns^p waird^q alse^r groet als wine nu dair hebben dair die somme of loipt, jaerlix blivende, behalven dat wi den heren van Sente^s Pieters van Utrecht^t ende anderen luden hier te voren dair uyt bewijst hebben, ende behalven den vri lande dat onse manne aldair van ons houden te liene, neghen hondert achtien pond, vijf scellinghe ende zes penninghe Tornoyse^u, dair die daghe jaerlix of vallen van der eenre helfte te Paischen ende dander helfte te sente Remijs misse^v. Item op onsen uyt^w lande in Monsterkerke, die houden vijf ende dertich morghen lands of dair omtrent ende ghelden jaerlix een ende dertich pond, zes scellinghe, achte penninghe Tornois^x, ende ^y die dach of es van der betailinghe sjaers toite sente Remijs misse, ende verpacht sien dit jaer ende die naiste jaer naest comende. Item op onse uytlande van ^z Almsvoete, houdende twintich morghen ^a' ende vier hont lands^b' of dair omtrent ende ghelden jaerlix zeven ende dertich pond, zes scellinghe, ^c' achte penninghe ^d', ende ^e' die dach of es van der betailinghe sjaers toite sente Remijs misse, ende verpacht sien dit jaer ende dit naist jair naist comende. Item op een stuc lands toit Almsvoete dat Willaem Kic in hurewaren hadde, houdende jeghens vier morghen lands of dair omtrent, dat gheld jaerlix drie pond Tornois^f', ende die dach van der betailinghe of pleghet te vallen jaerlix toite sente Mertijns^g' misse in den winter^h'. Wilke bewisinghe van desen goede ende renten voirscreven wi zullen waren ende doen ghewaren heren Willaem^i' grave van Ghulijc voirs. ende sinen arfnamen na der manieren van den hantvesten die ghemaect zien van den huwelijc twisken him ende onser dochter voirs.; ende ombieden ende ghebieden onsen bailiu, onsen rentemester ende anders allen onsen goeden luden van Zuytholland^j' dat si den grave van Ghulijc onsen sone^k' voirs., of sinen ghewairden bode dien hijt bevelen zel, dese renten ende goid voirscreven also als wise him hier voiren bewijst hebben laten ghebruken ende op heffen vrilijc jaerlix toit sinen scoensten^l' ende ter bester oirbair, ghelijc dat wi ende onse boden hier te voren ghedaen hebben, ende him dair in ghehulpich ^m' ende voirderlijc sien zo waneer sijs begheren ende te doene zullen hebben. Wair oec dat sake dat onse land van Zuytholland^n' dair dese renten ende bewisinghe gheleghen sijn, des God verbieden moete, alsoe vervloyede jof te niete worde dat die grave van Ghulijc voirs. jof sine arfnamen na der manieren voirscreven dese renten ende bewisinghe aldair niet heffen en mochten, so zouden wi of onse arfnamen verbonden zien dat te versiene ende te beterne also dat hi sine volle^o' bewisinghe hadde dat hijs ende sine arfname ghewesen mochten.

Ende omme dat wi willen dat den grave van Ghulike^p' onsen sone voirs. ende sinen arfnamen dese bewisinghe^q' van den goide ende renten voirscreven waste^r' ende ghestade houden sien in zulken manieren alst voriscreven es, ende sonder alrehande archlist, so hebben voir^s' ons ende voir onse nachomelinghe dese letre^t' open bezeghelt mit onsen zeghele. Ghedaen ende ghegheven tote Woudrichem^u' des zonnendaghes voir sente Lourens^v' dach int jaer ons Heren M CCC XXIX.