Registers van de Hollandse grafelijkheid 1299-1345

Jan heer van Arkel, ridder, geeft graaf Willem III toestemming de kapel die deze heeft gebouwd in Ammers te laten wijden tot parochiekerk en daarvan de begeving uit te oefenen, hoewel die plaats valt onder de parochiekerk van 's-Heer-Aartsberg, waarvan hij zelf de begeving bezit; alles behoudens de rechten van deze moederkerk.

Vgl. nr. ZH 177 alsmede nr. WI 272.

Wi Jan here van Arkel, ridder, maken cond ende kenlic alle die ghene die desen brief sullen sien of horen lesen. Want een edel prince, onse lieve here here Willem^a grave van Heynnegouwen^b etc., binnen der vrihede van sire porte toit Ammers heeft doen maken ene capelle omme te doen wyen ende te ordineren enen prochikerke toter poirte^c behouf van Ammers^d voirscreven, omme dat die poirters die nu dair wonachtich sien ende hier naemaels in comen sullen metter wone niet wel tote horen^e ghenoighe versoeken moghen die prochikerke van Heren Arnouds berghe^f, die toit onser ghiften behoird, soe hebben wi omme bede ons liefs heren des graven vors. hem ontrumed ende gheoirloft dat si binnen der vrihede van Ammers^g alst vors. es doe wyen ende maken ene prochykerke dair sine poirters vors. prochien moghen ghelike datmen^h doit in anderen prochikerken, ende dat onse here die graveⁱ vors. ende sine nacomelinghe^j behouden sullen die ghifte van der voirseyder kerke binnen der vrihede van Ammers^k als si toter prochikerke ghewiet ende gheordinert sal wesen, behoudenlic der moederkerke van sHeren Arnouds borghe^l hoir recht alse weseliken ende redeliken es.

In kennessen hier of zoe hebben wi voir ons ende voir onse nacomelinghe, die wi hier mede^m verbinden, desen brief open bezeghelt med onsen zeghel. Ghegheven tote Woudrichem op sente Marien Magdalenen dach int jaer ons Heren M^o CCC^o een ende dortich.