Registers van de Hollandse grafelijkheid 1299-1345

Dirk graaf van Kleef verkoopt graaf Willem III de helft van heerlijkheid en stad van Heusden, namelijk dat deel dat de kinderen van Horn van hem in leen houden, en hij belooft dat ook zijn dochters zullen afzien van alle rechten op dit goed.

Vgl. nr. ZH 465, de Latijnse versie van deze oorkonde, alsmede nr. ZH 466.

Wi Diederic grave van Cleve maken cond allen luden dat wi ^b vrilike vercoft hebben eenen edelen manne heren Willaem^c grave van Heynnegouwen^d, van Holland^e, van Zeland^f ende here van Vriesland, alle dat recht ende manscap die wi ^g hebben of hebben moghen an die halve heerscappie van der stat ende van den lande van Hoesdane die die kinder van Horne van ons houden, ende scelden recht ende manscap dair of vrilike quite tote des graven behoif van Heynnegouwen^h ende van Hollandⁱ voirscreven, behoudelic heren Janne here van Lynne^j onsen broeder alle sijns rechts dat hi hevet an die ander helfte van der heerscappien van der stat ende van den lande van Huesdane^k voirscreven, dat hi van ons houdende es ten rechten man leene^l.

Ende om dat wi desen coip voirscreven voir ons ende voir onse nacomelinghe vaste ende ghestade houden sullen ende willen, soe hebben wi desen brief open beseghelt met onsen groeten zeghel; ende gheloven den grave van Heynnegouwen^m ende van Hollandⁿ voirnoemd dat wi onsen dochteren desen voirseyden coip vaste ende ghestade sullen doen houden ende quite scelden met horen openen brieven ende horen mombaren, sonder archlist. Ghegheven tote Sente Quintijns up Ascentien avond int jair ons Heren M^o CCC^o vier ende dortich.