Allard van Buren, knaap, verklaart dat graaf Willem III hem vergeven heeft, en dat hij van hem de 50 morgen in en rond Aalswijk in leen heeft ontvangen welke hij hem had opgedragen; voorts belooft hij op de eerste heervaart waarop de graaf hem ontbiedt op eigen kosten te zullen dienen met 25 ruiters voor 6 weken of met twee koggen vol lieden voor zolang de krijgstocht duurt, en hem daarna te zullen dienen zoals de andere welgeboren lieden en leenmannen van het land doen.
Allairt van Buyeren.
Allen den ghenen die desen brief zullen sien jof horen lesen, Allaerd van Buren, knape, saluyt ende kennesse der wareyt. Ic make u cond dat mi mijn lieve ende gherechte here hair Willame, grave van Henegouwena, van Holland, van Zeeland ende here van Vriesland, hevet ontfanghen tsiere vrienscip ende hevet mi vergheven sinen evelen moet toet op den dach van huden. Voirt so hebbe ic van hem ontfanghen ten rechten liene ende hem op ghedraghen vijftich morghen lands die gheleghen sien in Aelwijc ende naiste dair omtrent. Voirt so hebbe ic hem ghelovet te dinen met vive ende twintich mannen te paerde op mijns zelfs coste zes weken, die eirste reyse dair hies te doen hevet ende hi mi ombiet; ende vielt dat hi te watere mijns te doen hadde, zoe sal ic hem in die zelve maniere also langhe alse die reyse duret dienen met twien cogghen vol lude. Ende hadde hi dair na mijns dienste in herevairden jof in reysen te doene, zo sal ic hem dienen ende hi zal ons doen als hi anders sinen welgheboren luden doet van sinen lande ende sinen mannen; ende hebben onsen lieven here voirs. ende sinen nacomelinghen graven van Holland ghelovet te dienen witteliken ende trouweliken, sonder arghenlist, ende hebbe hem in oirconde hier of dese lettere ghegheven bezeghelt met minen zeghele uythanghende.
Ghedaen in die Haghe op den dertiendach van meye int jaer ons Heren M CCC ende dertien.