Registers van de Hollandse grafelijkheid 1299-1345

Jan van der Dussen, ridder, schenkt zijn echtgenote vrouw Agnes en de toekomstige kinderen uit hun huwelijk een lijftocht van 150 pond Hollands per jaar uit zijn tiende te Nieuwerkerk aan de Alm; de oorkonde wordt medebezegeld door de borgen Jan van Drongelen, Jacob Neve, Jan Brievonc en Hendrik Marienz. alsmede door de overborg graaf Willem III.

Cf. nr. ZH 119.

De onderstaande tekst is gebaseerd op afschrift B.

Allen den ghenen die desen brief zullen zien jof horen lesen, ic Jan van der Dussen ridder, saluyt ende kennessen der waerheyt. Ic make cond ende kenlic allen luden dat ic gheloft hebbe ende gheloven in^a goeden trouwen veren Angheniesen^b minen wive te maken tote hare lijftochte anderhalf hondert pond Hollands^c sjaers, op hore ende op onse kindren tecomen die wi teghader hebben zullen; ende waer dat zake dat ic^d storve sonder kindre van hoir te hebben, zo zalt hair bliven toit hare lijftochte die helft van anderhalf hondert pond^e Hollands sjaers ende uyt varen met hare tucht ende met hare medeghave sonder scout, ende die ander helfte die zal op minen erfnamen comen. Ende dese anderhalf hondert pond Hollands sjaers die bewise ic hair jaerlix intenemen op ene tiende die ic hebbe ter Niewer kerken op die Halme in sButs ambocht van der Eme, die ic houde van den here van Hoirne; ende ghebrake yet an desen tiende voerseyd dat si niet soe goed en ware als anderhalf honderd pond Hollands sjaers, zo ghelove ic hair dat wel te voldoene van anders minen liene goede dat ic hebbe, waer dat gheleghen es, ende in zekeren stede te bewisen binnen jaers. Ende waer enich ghebreck an mi dat dat ic niet en voldede als voerscreven es, zo bidde ic Jan van Dronghele minen broeder, Jacob Neve, Jan Briefhonc^f ende^g Heynric^h Marien zone dat si mine borghen willen wesen ende met mi desen brief bezeghelen, ende bidde minen lieven ende gherechten here mijn here die grave van Henegouwenⁱ, van Holland^j dat hi een over borghe wesen wille ende^k desen brief bezeghelen^l met mi^m ende met minen borghen voernoemd alse een over borghe.

Ende wi Jan van Dronghele, Jacob Neve, Jan Briefhonc ende Heynric Marien zone maken cond ende kenlic allen luden dat wi omme bede willen ende versoec sheren van der Dussen zine borghen woerdenⁿ zien tieghens veren Angheniesen^o sinen wive van^p alsulker beloefte^q als hi hair belovet hevet alst hierboven gescreven^r es; ende waer an ons enich ghebrecht^s dat wi dese voirseyde lijftocht niet en helden alse voerscreven es, so gheloven wi elc van ons voirnomd in tevaren^t legghen te Delf op onsen coste, so wanneer dat dat ons veren Angheniesen^u jof Florens van der Bouchorst^v hair broeder jof hair ghewaerde bode vermanen zal, jof tesendenne voer mi Jan^w van der Dussen binnen der poirten van Delf twie knapen in mine stede, ende elc van ons die borghen enen^x knape die te Delf^y bliven zullen op onsen coste ende niet van dane en zullen sceyden voir dat wi veren Angheniesen^z voirscreven^a' jof haren ghewaerden bode al voldaen hebben alsulc ghebrec^b' als si an ons hebben zoude. Ende wi Willaem^c' grave van Henegouwen^d', van Holland^e', van Zeeland^f' ende here van Vriesland^g', omme bede ende versoeke die hair Jan van der Dussen an ons ghedaen hevet een over borghe woerden^h' zien alse van der belofte voers. te voldoen ende te volcomen, waer enich ghebrec an heren Janne van der Dussen ende an sinen borghen voerscreven. Ende ic Jan van der Dussen voernoemd^i' ghelove in goeden trouwen allen minen borghen voerscreven scadeloes te houdene ende te quiten op al mijn goed, waer dat gheleghen es.

Voird waer dat zake dat vere Angheniese^j' mijn wijf voir mi storve sonder kinder van mi te hebben, zulke medeghave ende goed als ic met hair ghenomen hebbe des zouden wi weder gheven onsen lieven here den grave voernoemd twie hondert pond Hollands, ende Florens van der Bouchorst^k' zouden wi weder gheven jof sinen erfnamen drie hondert pond Hollands, ende sonder scout; sonder erghenlist.

Ende omme dat wi willen dat alle dese voerseyde Voerwaerden^l' ende zake ^m' vast ende ghestade bliven ende wel ende ghetrouwelike^n' ghehouden, hebben wi Jan van der Dussen^o' ridder, Jan van Dronghelen^p', Jacob Neve, Jan Briefhonc ende Heynric Marien sone alse borghen met ghesamenderhand ende onghesceyden desen brief bezeghelt met onsen zeghelen; ende wi Willaem^q' grave van Henegouwen^r' voernoemd hebben als een over borghe desen brief met hem ende met sinen borghen voerscreven bezeghelt met onsen zeghele, in kennessen der dinc voerseyd. Ghedaen in die Haghe op sinte Pieters dach inghende^s' oiste int jaer ons Heren dusent drie hondert twie ende twintich.