Registers van de Hollandse grafelijkheid 1299-1345

Graaf Willem III verklaart dat hij met hertog (Jan III) van Brabant een voorlopige regeling heeft getroffen betreffende het hoge gerecht van de ambachten van Jan van Drongelen waarop Jan van Heusden aanspraak maakt, en dat hij met de hertog is overeengekomen dat zij en hun medestanders een verzoening van hun twist en de daarin geleden schade zullen verblijven aan de uitspraak van heer Floris Berthout heer van Mechelen, heer Gerard heer van Voorne, burggraaf van Zeeland, heer Jan heer van Arkel en heer Rogier van Leefdaal, ridders, met de bepaling dat dit college in geval van onenigheid een vijfde scheidsman zal aanstellen, wiens stem de doorslag zal geven.

De identieke oorkonde op naam van de hertog van Brabant en bestemd voor de graaf, genoemd in de afsluitende notitie, betreft nr. BR 11. Zie voorts nr. BR 13.

De onderstaande tekst is gebaseerd op afschrift B.

Wi Willaem^a grave^b van Heynnegouwen^c etc. maken cond allen luden dat wi met enen^d edelen manne ende ene moghende, onsen lieve neve den hertoghe van Lotterike^e, van Brabant ende van Lochorst^f, van den hoghen gherechte van den ambochten die Jan van Dronghelen^g besit ende Jan van Hoysden^h zeghet dat hem toe behoren soude, over een ghedraghen sien alseⁱ dat die here van Erkel^j die hoghe gherechten ^k van den ambochten voirs. in sinen handen hebben zal ende besitten van beyden partien weghen, tot diere tijd dat besceyden es wie dat hoghe gherechte van hem ^l twien met den rechte van den hertoghe^m voirs. houden zal. Voirtⁿ zullen wi den hertoghe voirs. sinen scade die hem zelven ghesciet es an sinen propren goede, ende den scade die sine porteren van den Bosche^o ende sinen mannen ende sinen luden die onse vyande niet en sien, ghelden also groet alse edelen^p luden here Florens^{q r} Bartoud den here van Machlen, heren Gherard^s here van Voirne, borchgrave van Zeeland^t, here Janne here van Ercle, heren Rotgier^u van Levedale, riddere, ter waerheyde vinden^v zullen ende groten dat hem ghesciet es van onsen luden die wi ghesent hadden omme onse viande te cranken, ende dair of zullen wi bi deser viere ghemeenre acorde voirscreven hem ghelden ende sine ^w ghemoede hebben voir alle ding; ende des ghelike zal ons die hertoghe voirs. voir alle ding onse scade ghelden die ons ghesciet es an onsen properen goede van onsen ouderen toe comende^x bi desen vieren voirscreven, in alre manieren als wi hem sine scade ghelden zullen. Voird sien wi van allen tuyste, broke ende eyske die die hertoghe van Brabant voirs. ende sine helperen ons ende onsen helperen eyskende sijn, ende wi ende onse helpere hem weder, van der^y oirloghe van Hoysdenne^z ende dat dair of roert tote op den dach toe van huden, ende van allen tuyste, broke ende eyske die wi ende onse helpere ende die van den Broeke^a' eyskende sien Janne van Hoysdenne, Janne van den Elshoute ende horen helperen, ende si ons weder, ende van allen tuyste, broke ende eyske die hair Jan van der Dussen, ridder, Jan van Dronghelen, Jan van Wiscle^b', Heynric^c' Marien sone, Tielman die Moilnaer^d' ende hoir helperen eyskende sien Janne van Hoysdenne, Janne van den^e' Elshoute ende horen helperen, ende si weder, uyt ghenomen den here van Zalsen berghe^f' die hem zelven uyt gheset hevet, ghebleven sien an den here van Machlen, den here van Voirne, den here van Ercle^g' ende an heren Roggier^h' van Levedale voirs.; ende so wat dese viere voirscreven ghemeenlike over een draghen ende met ghemenen acoirde zegghen zullen van der  oirloghe voirs., dat gheloven wi voir ons ende voir onsen helperen ende voir die van den Broeke^i', voir heren Janne van der Dussen, ridder, Janne van Dronghele, Janne van Wiske^j', Heynric^k' Marien sone, Tielman die Moilnaer^l' ende horen helperen trouweliken te houden ende te doen houden. Ende waer dat zake dat dese viere segghers voirs. in enighen ponte discordeerden, so souden si eer si enich segghen seyden van der  oirloghe voirs. enen over man nemen bi ghemenen acoirde, ende die hem alle vieren ghenochde; ende met wilken hore twien van hem viere voirs. dair die over man mede over een droghe alse van den ponte dair si omme discoirdeerden, dat soude ghestade bliven. Ende omme dat wi ene ghestade^m' soene hebben willen, so hebben wi gheloeft hoir segghen te houden, oec so wat si segghen van der orloghe voirs.; ende endaden^n' wijs niet, wi souden den hertoghe voirs. gheven tien dusent pond Tornoyse^o', den groete over zestien penninghe ghereekent. Ende hier bi zullen die herthoghe ende sine helperen voirs. ende wi ende onse helperen onderlanghe versoent sijn, ende die partien voirscreven ende hoir helperen onderlanghe versoent sijn, ende Jan van Hoesdenne ende Jan van Elshoute ende hoir helpere tyeghens ons, onsen helperen ende dien van den Broeke^p' onderlanghe versoent sijn, ende hair Jan van der Dussen, ridder, Jan van Dronghelen, Jan van Wiscle^q', Heynric^r' Marien sone, Thielman die Moilnaer^s' ende hoir helpere tyeghens den hertoghe ende sine helperen versoent sien, ende alle die ghene die ter oirloghe voirs. behoiren ende hoir helperen van allen siden; ende die in dese soene ghesoent sien alse voirscreven es, die zullen hoirs goeds vriliken ghebruken ghelike dat si deden eer die oirloghe voirs. beghonde. Ende waer dat zake dat van desen vieren seggheren voirs. enich storve of kenlike noet sake hadde, soe souden wi van onser zide waer dat hi ons dair ghebrake, jof die hertoghe voirs. van siere siden waer dat hi hem ghebrake^t', enen anderen in sine stede setten; ende alle dese stucken voirsreven sonder arghenlist.

In oirkonde etc.  Ghegheven tote Machlen des dinxendaghes voir sinte^u' Lucas dach ewangelisten int jaer ons Heren M CCC een ende twintich.