Registers van de Hollandse grafelijkheid 1299-1345

Graaf Willem III draagt Jan van Polanen het kasteel Nuwendoorn op, die het tegen een vergoeding van 150 pond Hollands per jaar zal bezetten met vijftien man en van mondvoorraad zal voorzien, terwijl geschut door de graaf wordt geleverd en in tijd van oorlog een grotere bezetting door hem zal worden bekostigd; het zal een open huis voor de graaf blijven en na Jans overlijden weer aan hem toevallen.

De onderstaande tekst is gebaseerd op afschrift B.

Wi Willaem^a grave^b van Henegouwen^c, van Holland^d etc. maken cond allen luden dat wi Janne van Pollanen onsen trouwen man bevolen hebben ende bevelen onse huys tote Nuwendoren^e in Vriesland^f te verwaren ende te houdene tote sinen live, met vijftien mannen die upt huys bliven sullen wel te houden ende te verwaren. Ende voer sinen cost ende van siere knapen sullen wi hem alle jare doen betalen anderhalf hondert pond Hollands^g, die ene helfte tote Alreheylighen daghe^h ende die ander helfte tote onser Vrouwen lichtmisseⁱ daer na, ende aldus van jare te jare ten twien tiden voers. also langhe als hi levet. Ende daer bi so^j sal hi onse huys voers. spisen ende te reke houden op sinen cost, ende altoes tote ^k enen jare wel ghespiset alse den huse toe behoerd, sonder arghenlist. Ende also als hi nu onse huse voernoemt ghehavicht ende te reke vint, so sullent ons sine erfnamen na siere doet des ghelike op leveren jof onsen erfnamen. Ende also langhe als hi levet so sal hi thuys voers. houden ende verwaren tote onser behoef, ende sal altoes onse open huys bliven. Ende na siere doet so zal thuys voerscreven weder an ons comen jof an onsen erfnamen. Ende wi sullen hem leveren hoestalle, bliden, armborsten, ghescot ende alle were dat den huze toe behoert op onsen cost; ende dat selve sullen si ons weder levren na siere doet, het en ware dat ghebesicht ware in onse oirloghe. Ende waer dat sake dats noet dede van oerloghe, dat wi meer luden dan vijftien mannen opt huis voernoemt wilden hebben, van also vele meer luden alse boven den vijftien mannen daer op comen souden om thuys helpen te houden ende verwaren, souden wi hem horen cost redelic betalen bi onsen rentemeyster van Kenemaerland^l ende van Vriesland. Ende onbieden narenstelike ende bevelen onsen rentemeister van Kenemaerland^m ende van Vriesland die nu es jof hier na wesen sal, dat hi Janne van Pollanen alle jare betale ten daghen voerscreven die anderhalf hondert pond Hollandsⁿ alle jare also langhe als hi levet, sonder ander ghebot van ons te hebben; ende dat hi van hem neme telken paymente die hi hem doen sal van also vele sijn open brief van quitantien mede jeghens ons te rekenen; ende dat hi des niet en late.

Hier over waren die bisscop van Zuden, die abt van Middelburch^o, mayster Jan van Florenche, haer Symon van Bentem^p, Willaem^q die camerlinc, Willem^r veren Baerten^s sone, Enghebrecht^t onse rentemeister van Noirtholland^u, Mathijs Renghiers^v sone ende Gheret van Leyden.

In orkonde etc. Ghegheven tote Dordrecht^w des woensdaghes voer sinte Laurens daghe int jaer ons Heren M^o CCC^o een ende twintich.