Registers van de Hollandse grafelijkheid 1299-1345

Graaf Willem III doet uitspraak in een geschil binnen Staveren.

De onderstaande tekst is gebaseerd op afschrift B.

Wi Willaem^c grave^d etc. maken cond etc.^e dat wi onse goede lude van onser poirte van Staveren^f die die oude scepen die scepen waren te Staveren^g int jaer ons Heren M CCC XXI^o ende hoir helpers op die ende side, ende Alkemante op die ander side, van allen tviste, broke ende eyske die si malic anderen eyschende sien an ons ghebleven sien, ende hebben ons dair of onse segghen ghelovet te houden, elke side op vijftich pond groete; wair of wi wel versien ende wel beraden mit onsen ghemenen Rade segghen enen soene ende onse segghen als hier na ghescreven staet.

In den ersten segghen wi, wand die oude scepen voirscreven ghecoren worden van den ghenen die onse ghewarde scoute was ende van onser goeder meenten van Staveren^h, also alse hoir handveste hout die si van ons ende van onsen ouders graven van Hollandⁱ hebben, zo segghen wi alsulke vonnesse als die scepen voirs. ghewijst hebben, dat die ghestade bliven sullen die si wiseden binnen den jare voirscreven doe si scepen waren. Voird want die niewe scepen ghecoren sien toit onsen weder segghen, so segghen wise dair of quite ende verdreghen hem van den scependoem; ende sullen hem nu enen scoute setten, ende segghen dat onse scoute mit onser ghemeente ^j van onser poirte voirs. niewe scepen kiesen sullen, also als hoir hantveste spreket. Voirt segghen wi dat onse scoute ende onse scepen diemen kiesen sal van allen twiste die beyde partien voirscreven onderlinghe hebben, ende ghesciet es sent dier ouder scepen jaer uytghenc voirscreven, die rechte wareyt dair of onder soeken sullen ende na der wareyd mit den rechte besceyden. Voert van der soene die Alkemante segghet dat die griecman soude tusken den ouden scepen voirs. ende hem: es dat onse scoute ende die scepen diemen kiesen sal ter wareyden vinden dats die oude scepen an den griecman bleven ende dair op gheseyd ende ghesoend es, so willen wi dat die soene ghestade blive; vinden si oec ter warheyde dat die scepen voirs. an den griecman niet en bleven ende dattet jeghens horen wille ghesoend was, so willen wi dat men voirt vare mit alsulken rechte alse scepen ghewijst hebben; ende in allen pointen behouden ons rechts. Ende hier bi segghen wi ene alinghe soene tusken beyden^k partien voirs., ende so wie die se brake, dat wair op sijn lijf ende op sijn goed. Ende alle stucken voirscreven sonder archlist.

Ende omme dat wi willen dat alle stucken voirscreven vaste ende stade bliven ende wel ghehouden, zoe hebben wi desen brief beseghelt mit onsen seghel. Ghegheven in die Haghe des dinxendaghes na meyedach int jaer ons Heren M CCC twe ende twintich.