Registers van de Hollandse grafelijkheid 1299-1345

Graaf Willem III doet uitspraak in een geschil tussen Arnoud Steyveldenz., Altgeer Jacobsz. en diens broer Thade, allen uit Enkhuizen, en die van Lübeck, welke laatsten de eersten eerder in Lübeck gevangen genomen hadden en hun schip en goederen hadden geconfisqueerd, maar hun na vrijlating en restitutie nog een vergoeding schuldig waren.

Vgl. in dit register nr. FR 125 alsmede de nrs. FR 136-139.

Wi Willaem^b grave^c etc. maken cond^d allen luden^e. Want onse lude van Enchusen^f alse Arnoud Steynelden^g sone, Altgheer Jacobs sone ende Thade sijn broeder ghevanghen worden te Lubeke ende hoir scip ende goet ghenomen omme des oirloghen willen van Staveren^h, dair wi of verstaen dat si ghene scout toe en hadden, ende al est dat si uter vanghenessen ghelaten sijn ende hair scip ghegouden als wi verstaen, soe croenden si nochtan omme groeten scade dien siere omme gheleden ende verteerd hebben. Ende want die van Lubeke des an ons ghebleven sijn ende wi ons selves lude van Enchusenⁱ voirscreven dair in vervaen, soe segghen wi dat die van Lubeke gheven sullen Arnoud ende sinen tuyen^j ghesellen voirscreven voir hoiren cost ende scade drie pond groete, te betalen op den naisten meyedach te Hairlem, ende dit ghelt sullen Arnoud ende sine ghesellen voirscreven evenlike^k deelen. Ende en ware Arnoud voirs. sijn dele van den scepe niet ghegouden, mach hi noch wittelike betoghen dat dat verendeel van den scepe siene was ende niet dier van Staveren^l, soe sal men hem sijn deel ghelden alsoe groet in gheliken deelen alst dat ander vercoft was, te betalen toter stede ende op den meyedach voirghenoemt^m. Ende hier bi segghen wi eene goede soene tuschen den partyen voirscreven, ende soe wat sonderlinghe persone diese brake, dat ware op sijn lijf; dat soude staen toit ons selves proeveⁿ mit wien wi wilden. Vernamen wi datse yemend van Lubeke brake, dat soude wi scriven an hoire stede dat siere over rechten deden; brake se oic yemend van onsen luden van Enchusen voirscreven, dair souden wi over doen rechten. Ende alle stucken voirscreven sonder archlist.

In orconde desen brieve beseghelt met onsen zeghel^o. Ghegheven op sente Lucas dach ewangelisten int jaer ons Heren dusend driehondert drie ende dertich.