Registers van de Hollandse grafelijkheid 1299-1345

Filips Vilain verklaart dat hij, in het kader van een door de graaf van Vlaanderen uitgesproken zoen met betrekking tot de dood van zijn broer heer Jan Vilain, van graaf (Willem III) 2000 pond Tournois heeft ontvangen alsmede, uit handen van heer Wouter Bau de oude, poorter van Mechelen, 500 pond Tournois ten behoeve van twee kapelanijen voor Jans zielenheil en 15 pond Tournois vanwege twee opgelegde bedevaarten, waarmee hij en zijn broers geheel voldaan zijn.

Vgl. nrs. HE 45-47.

Philips Vilein^a doe te wetene ende make kenlic allen den ghenen die nu sien ende hier na comen zullen dat ic hebbe ontfaen van enen hoeghen ende^b machtighen^c prinche, minen lieven gheminden here minen here van Henegouwen^d, twie duzentich pond Tournoise^e, die^f grote Tournoyse^g te zestien penninghe, van den segghene dat mijn here die grave^h van Vlandreⁱ seide van mijns here Jhan^j Vileins^k doit, mijns broeder, daer God die ziele af hebben moit, van wilken II^M ponden Tournoise^l voers. ic mi houde wel ghepait ende vergouden mit ghereden penninghen te minen wille, ende daer af scelde ic minen here den grave van Henegouwen ende sijn hoyr quite tallen daghen over mi ende over mine brodere. Voerd heb ic ontfaen van minen here den grave van Henegouwen^m voren ghenoemd bi den here Woutren Bauwe den ouden, poirtre inⁿ Machline, van den selven segghen te twien capelrien behoef over mins heren Jans ziele, mins broders voren ghenoemd, vive hondert pond Tournoise^o, die grote te zestien penninghe, van den wilken V^C lb. Tournoise  ic mi houde wel ghepait ende vergouden te minen wille. Vord heb ic ontfaen van mins heren weghen sgraven van Henegouwen^p bi den here Woutren voerghenoemd vijftien pond conix Tournoise over twe pelegrimagen die mijn here van Vlaendre^q wijsde te doene in sijn segghen, dat is te weten ene pelegrimage te mijns heren Sinte Jacobs in Galissie^r van drien personen, ende ene in Chipors^s van twien personen. Ende mids al desen voers. ontfanghe kenne ic Philips Vilein voers. over mi ende over mine broedre dat segghen van minen here van Vlaendre^t alse van mins here Jans doet, mins broders voerghenoemd, wel ende ghetrouwelike is vulcommen^u, ende dat mijn here van Henegouwen mi ende minen broderen vulcommelike ghenoech hevet ghedaen van al dat mins heren segghen van Vlaendren^v in hadde van den zoendinghe^w van mins heren Jans doet, mins broders, dair God die ziele of hebben moit; ende omme dat mijn lieve gheminde here, mijn here van Henegouwen^x, mi ende minen broderen volcomelike ghenoech hevet ghedaen mit ghereden penninghen van den zoendinghe van mijns heren Jans Vileins^y doit, mijns broeders voerghenoemd, so scelde ic hem ende sijn hoir quite tallen daghen over mi ende over mine brodre van al dat tvoernoemde zoendinc in hadde, ende ghelove hem up mi ende up al mijn goit, wair dat gheleghen is, dair of scadeloes ende al scadeloes te houden tallen daghen.

In orcontscepen ende in kennessen van dezen letteren ghezeghelt mit minen propren zeghel uythanghende. Ghemaect ende ghegheven tAntwerpe^z in sinte Pieters daghe ingaende oist int jaer ons Heren doemen screef Sijn incarnacien M drie hondert vive ende twintich.