Registers van de Hollandse grafelijkheid 1299-1345

Graaf Willem III schenkt Nicolaas van Uitgeest, voorheen schout in Alkmaar, 12 pond Hollands jaarlijks, waarvan 6 pond als lijftocht voor diens echtgenote, te betalen door diens broer Simon Moyke, de nieuwe schout; tevens bepaalt de graaf hoe te handelen bij overlijden van een van de partijen.

Vgl. de volgende oorkonde nr. KE 124 in het register.

Wi Willaem^b grave van Heynnegouwen^c etc. maken cond etc. Want Clays van Uytgheeste, die onse scoute was toit Alkemair ende dair of verliet was, ons dat scout ambocht opghedraghen heeft ende quite gescouden, soe hebben wi Clayse voirs. ghegheven toit sinen live twaelf pond Hollands^d sjaers, alle jare hem te betalen tote Kersavonde^e, ende dair of zal hebben sijn wijf die hi nu heeft toit haire lijftocht zes pond Hollands^f sjaers; ende dese twaelf pond Hollands^g sjaers zal Symon Moykiaen, die wiet scoutambocht voirs. te sinen live bevolen hebben, voir ons betalen Clayse voirs., sinen broeder, ende sinen wive, alse langhe als Symon levet, te sulken daghen alze voirscreven is. Ende sturve Symon eer Claes, soe soude wi Clayse selve dair of voldoen; storve oec Clays eer sijn wijf, soe soude Symon hoir gheven toit haire lijftochte alse langhe als si^h levede zes pond Hollansche sjaers; sturve oec Symon eer si, soe souden wise hoir selve doen gheven alse langhe als si levede ten daghe voirscreven.

In orkonde desen brieve etc. Ghegheven in die Haghe des dinxendaghes voir Pinxter int jair ons Heren M^o CCC^o acht ende twintich.