Registers van de Hollandse grafelijkheid 1299-1345

Graaf Willem III verkoopt aan Engebrecht de Jager een nader omschreven perceel in het ambacht van Filips van Wassenaar in erfhuur.

^a Willaem^b grave etc. maken ^c etc. dat wi vercoft hebben in eerfhure omme VII s. V½ d. Hollands^d syaers Enghebrecht^e den Jagher een stucke lands, veen ende gheeste, sonder mate, dat gheleghen es beoisten Haghe houte^f in Philips ambocht van Wasnar^g binnen desen marken: an die zuitsyde wi selve mit onser wildernesse, an die nortsyde^h Jan veren Hasekijnⁱ sone met liene dat hi van ons hout, an die westsyde Imme^j Blijfghers met onser hurewar ende an doistsyde^k Jacob Steynelde sone met eyghene lande, wilc land ons ane quam van Clays Arnts^l f. erfname; ende hier of heeft ons dese vorseyde Enghebrecht^m betailt alse dair hijt omme ⁿ coipt, boven die vorscreven hure die hi jairlix gheven zal, XXXVI lb. Hollands^o, darof zo gaet van afterstallinghe^p die onsen rentemeister van Northolland^q ombraken van een deel jaren XLIIII s. Hollands^r, ende van den anderen ghelde sal ons Inghebrecht^s van Vorscoten^t, onse rentemeister van Northolland^u, goide rekeninghe doen. Ende wi sullen Inghebrecht^v den Jagher vors. den coip van den vornoemden lande ghewaren alsmen erven sculdich es te waren.

In orkonde etc. Ghegheven in die Haghe up sente Laurens dach int jaer van XXXII^o.