Registers van de Hollandse grafelijkheid 1299-1345

Graaf Willem III bevestigt de schenking door Dirk de Visser aan diens echtgenote jonkvrouw Hildegonde van een lijftocht bestaande uit een woning en 6 morgen land aan het Westeinde van Rotterdam; voorts regelt hij de vererving van dit leen.

Wi Willaem^a grave van Heynnegouwen^b etc. maken cond etc. dat voir ons quam Diederic^c die Vischer ende maecte mid onser hand joncfrou Hildegonden, sinen witteliken wive, toit hoire rechter lijftocht die woninghe die gheleghen es ten West ende van Rotterdamme^d ende zes morghen lands dair die woninghe op staet ende alre naist der woninghen gheleghen sijn; ende in deser lijftocht soe gheloven wise^e te houden ende te bescermen na^f sede ende costume van onsen lande. Voirt soe wanneer joncfrou Hildegond storvet, soe sal dit leen voirscreven comen op den outsten sone die Diederic^g die Vischer^h ende joncfrou Hildegontⁱ te samen hebben; ende en hadden si gheenen sone, soe sout comen op hoir outste dochter die si te samen hebben. Ende dit es ghesciet bi Floris^j den Vischer, Dierix^k sVischers outsts soens wille.

Hier over waren hair Jan van Polanen ende Enghebrecht^l van Voirscoten^m, onse manne. In orkonde etc. Ghegheven in den Hagheⁿ des woensdaghes na Paischen in den jare^o ons Heren^p M CCC^q drie ende dortich.