Registers van de Hollandse grafelijkheid 1299-1345

Graaf Willem III beleent Jacob van Benthem met een jaarrente van 20 pond Hollands, uit te keren door de rentmeester van Noordholland en Woerden.

Wi Willem ..grave^a van van Heynnegouwen^b, van Holland^c, van Zeeland^d ende here van Vriesland^e maken cond allen luden^f dat wi hebben ghegheven ende gheven heren Jacob van Benthem^g, omme goeden trouwen dienst die hi ons ghedaen hevet ende noch doen sal, twintich pond Hollands^h tsjaers van ons te houden ende van onsen nacomelinghen tote eenen rechten leen, wilke twintich pond Hollandsⁱ tsjaers wi hem bewisen ane onsen rentemeester van Northolland^j ende van onsen lande van Woerden^k alle jare tontfanghen te meye; ende ombieden Gheret Heynen^l sone^m, onsen rentemeester van Northollandⁿ ende van Woerden^o voirs. die nu is jof namaels wesen sal, dat hi alle jare heren Jacob voirs. dese voirscreven twintich pond ute reyke ten voirscreven termine, ende neme sine brieve van quitancien omme jeghens ons mede te rekenen.

In orconde desen brieve bezeghelt met onsen zeghele^p. Ghegheven tote Dordrecht^q des sonnendaghes na Alre heyleghen dach int jair ons Heren M^o CCC^o viere ende dortich.