Registers van de Hollandse grafelijkheid 1299-1345

Koning Karel IV van Frankrijk gelast de baljuw van Amiens dat deze op basis van hem toegezonden stukken zijn beklag gaat doen bij graaf (Willem III) over verschillende incidenten waarbij personen en goederen uit Tournai op onrechtmatige wijze zijn gearresteerd door de bastaardbroer van de graaf en diens lieden, onder wiens jurisdictie zij niet vallen, en draagt op de graaf te verzoeken dat een en ander zal worden rechtgezet.

Charles par la grasce de Dieu roys de France et de Navaire, au ballif^a dAmiens, salut. Nous vous envoions plusieurs articles souz nostre contreseel contenans plusieurs prises de personnes et de biens, plusieurs mechans^b exces, violentes gries, oppressions et injures fais par le frere naturel de nostre amé et feal cousin le conte de Haynnaut^c, et plusieurs autres de sen gens et de son pooir faiz, si comme len dit a la communauté de Tournay, et par especiaul aus personnes nommees es dis articles; si vous mandons que le plus tost que vous poires bonnement ailliez au dit conte et li presentes de par nous les lettres que nous li envoions, contenans que il^d vous croie de ce que vous li dires de par nous, si li exposes et li dites et declares toutes les chozes contenues es dis articles, en tant comme elles touchent li, son frere, ses gens et ses autres subiez, et le requeres de par nous que les personnes prises et les biens retenus il face metre au^e delivre^f, les injures et domages adrecier et amender aussi comme il appartient a faire, en li signifiant que ^g en^h cas en quoy la dicte commune ou les singulieres personnes dycelle, et nommeement les personnes nommés es dis articles, seront en riens tenus au frere du dit conte ou a ses autres gens, toutes les fois que ils entrairontⁱ pardevers nous a qui la jurisdition en appartient, comme de ceuls qui sont nous justiciables de haut et de bas, sans moyen, nous le leur ferons adrecier briefement et de plain si comme raison devra. Et en outre li fachies assavoir que en^j cas en quoy le dit conte ne feroit les chozes dessusdictes, la quelle chose nous ne pensons pas, ains avons ferme fyance que il les face et acomplisse tost et sans delay, nous qui pluseurs fois len avons escript, ne poiriens plus souffrier que nous ni^k messiens tel remede, comme nous verriens que a faire seroit^l. Et tout ce que le dit conte vous en respondera et fera des choses dessusdictes, nous faites assavoir le plus tost que vous porres tout en autele maniere comme dessus est^m dit, parles au nostre amé et feaul cousin Alfon dEspangnieⁿ qui sont pour li a Antoingn, entant comme vous verres que les dis articles leur touchent; et de tout ce nous certefies le plus briefment que vous porres.

Donnees a Paris le XI^e jour de decembre lan de grasce mil CCC^o vint et chinc.