Registers van de Hollandse grafelijkheid 1299-1345

Bisschop Jan III van Utrecht verklaart samen met graaf Willem III een maarschalk aan te stellen aan deze zijde van de IJssel, voor de duur van twee jaar, die bij overlijden of ongeschiktheid tussentijds kan worden vervangen door hen beiden of, wanneer hij buitenlands is, door de graaf alleen, terwijl de inkomsten uit het ambt na aftrek van de kosten door hem en de graaf zullen worden gedeeld; voorts verklaart hij geen oorlog te zullen beginnen dan met goedkeuring van heer Gijsbrecht heer van IJsselstein, diens zoon heer Arnoud van IJsselstein, heer Jan van Polanen, ridders, en Engebrecht van Voorschoten, knaap.

Vgl. nrs. UT 138 en 142.

Wi Jan bi der ghenaden Gods biscop van Utrecht^b maken cond ende kenlijc allen den^c etc. dat wi omme die oirbair ons Ghestichts ende ons ghemeens lands ^d bi onsen Rade over een ghedraghen sien mit enen edelen ende hoghen prinche heren Willaem^e, grave van Heynnegouwen^f etc., also dat wi bi sinen rade ende goeddenken zetten sullen enen man die hem goeddenket ende wi mit hem over een draghen in onse marscalcambocht an deser side van der IJsel, mit al dien rechte dat dair toe behoirt, dat te bewaren ende te bedriven toit onser eren ende onser oirbair ende des Ghestichts van onsen weghen ende des graven voirs. dese twe jare naist comende durende, ende gheven den marscalc volle macht van alden mascalcambocht toe behoirt dair in te doen ende te laten, ende des sullen wi hem ghestaen. Ende wair dat sake dat^g die marscalc dien wi nu bi sgraven goddenken voirs. setten sullen storve binnen deser tijd^h voirs., jof dat ons jof den grave die marscalc of een ander die in sine stede ware binnen deser tijd voirscreven niet oirbairlijc en dochte toit onser behoef noch ons Ghestichts, zo souden wi enen anderen setten in sine stede bi rade ende goddenken des graven voirs., dien wi mit hem over een droghen alse verre als wi binnen lands waren; mair wair wi buten lands also dat wi dair of mit den grave voirs. niet spreken en mochten noch onsen wille segghen, zo gheven wi den grave voirnoemd macht enen anderen te setten in sine stede die hem goddochte, ende die selveⁱ gheven wi volle macht van al dat den marscalsambocht toe behoirt dair in te done ende te laten, des wi hem ghestaen sullen ghelike jof wine selve gheset hadden. Ende hier of sal die marscalc, so wie hi wesen sal, elcs jaers tenden jare goede rekeninghe doen voir ons ende voir den grave voirnoemd, jof voir den ghenen dien wijt bevelen sullen ende dient die grave bevelen sal des wi noch die grave dair bi niet wesen en mochten, in sulker manieren dat alle verboirnisse, boite, sconisse ende anders alle vervalle, so wair^j of si verscinen^k of comen sullen in den marscalcambocht binnen den tween jaren naist comende, die sullen wi ende die grave voirnoemd even ghelike delen, wi die ene helft ende hi die ander; ende den^l cost die die marscalc hebben sal van desen voirs. ambocht te verwaren, die sal die marscalc uten ghemenen vervale^m boren half ende half. Ware oic dat sake datter enich sonderlanghe cost quame op onse Ghestichte jof op onsen lande van orloghe, jof anderen saken die hem op comen mochten omme onse land mede te bedrivenⁿ ende te verwaren, dien souden wi hem op rechten ende voldoen bi segghen heren Ghisebrechts^o here van Yselsteyne, heren Arnouds^p van IJselsteyn^q sijns soens, heren Jans van Polanen, ridderen, ende Enghebrechts^r van Voerscoten^s, ons^t knapen, also als si segghen ende ordineren zouden dairof, sonder archlist; mair en gheen orloghe van onsen weghen noch van ons Ghestichts weghen te beghinen^u noch ane te nemen, ten sie bi goeddenken ende bi rade van desen vieren. Ende dat sal wesen behoudelijc sulker brieve als wi heren Arnoud^v van Iselsteyne^w, onsen lieven neve, ghegheven hebben van den scoutambocht van Amersvoirde^x ende van Emeland, ende behoudelijc der brieve die wi den here van Boecstel ghegheven hebben van den halven gherechte van Rienen^y.

In orkonde etc. Ghegheven toit Utrecht^z op sente Pieters dach ad chathedram int jaer ons Heren M CCC een^a' ende dortich.