Registers van de Hollandse grafelijkheid 1299-1345

Graaf Willem III en graaf Reinoud II van Gelre en Zutphen verdelen het Sticht Utrecht onder elkaar, inclusief de schulden van de bisschop ter hoogte van 44.000 pond zwarten Tournois, en beloven elkaar in dezen wederzijdse bijstand, ook tegen de stad Utrecht, met welke zij zich niet zullen verbinden.

Vgl. het volgende nr. UT 170.

Wi Willaem^c grave^d van Heynnegouwen^e, van Holland^f, van Zeland^g ende here van Vriesland ende Reynoud grave van Ghelre ende van Zuitven^h maken cond allen luden dat wi bi ghemeenen accorde van ons beden vor ons ende onse nacomelinghe over een ghedraeghen sien in der manieren die hier na bescreven staet. In den eersten sullen wi ..grave van Heynnegouwen hebben ende houden onder ons ende in onsen handen alle die heerheyd, steden, borghe, lant ende vesten, ende soe wat dair toe behorende is, ligghende an deene zide van der Ysele te Hollantⁱ wairt binnen den Ghestichte van Utrecht^j, dat den Ghestichte toe behoirt; ende wi grave van Ghelre sullen hebben ende houden onder ons ende^k in onsen handen alle die herheyd, steden, borghe, lant ende vesten, ende soe wat dat dair toe behorende es, dat den Ghestichte van Utrecht toe hoirt, ligghende an dandre zide van der Ysele te Westvalen wairt, mit al horen rechte. Ende hier omme soe hebben wi ..grave van Heynnegouwen ende grave van Ghelre ane ons ghenomen alle die scult die de bisscop van Utrecht nu ter wilen sculdich es, tote vier ende viertich dusent pond zuarte Tornoyse^l, luttel meer of min, sonder aerghelist; dats te verstane dat wi grave van Heynnegouwen deene helft ende wi grave van Ghelre dandre helft van der voirseyder scout ende nemmer an ons nemen ende houden, van also vele ghenoich te doene, sonder arghelist. Ende vort so beloven wi ..grave^m van Heynnegouwen ende grave van Ghelre voirseyd mallic anderen in goeden trouwen: wair dat sake dat yemend ons beden of onser een in desen voirseyden saken deren of hinderen wouden, dat yeghelike van ons denⁿ anderen helpen sal te sinen besten ende scoensten; ende negheen van ons tween en sal hem verbinden mit der stat van Utrecht^o. Ende wair oec dat sake dat die stat van Utrecht^p voirseid ons of enighen van ons of onsen nacomelinghen of van onsen vrienden veronrechten woude, dair sullen wi ende beloven voir ons ende onsen nacomelinghen mallic andren te helpene, in goeden trouwen, dat dat ghebetert worde ende verrecht. Ende alle dese voirseyde voirworden van pointe te pointe beloven wi mallic anderen^q te houdene in der manieren dat voirseyd es, sonder arghelist.

In orconde desen brieve bezeghelt mid onser twier zeghele. Ghegheven tote Camericke^r des sonnendaghes na sinte Jacobs ende sinte Christofels^s dach int jair ons Heren dusent drie hondert ende vier ende dortich.