Registers van de Hollandse grafelijkheid 1299-1345

Jan van Polanen, ridder, zegt graaf (Willem IV) toe dat deze de heerlijkheid en het goed van Brederode, dat hij als onderpand houdt van heer Hendrik van Brederode en diens echtgenote vrouw Isabella van Fontaines, mag lossen tegen betaling van de 1200 pond Hollands die hij daarop heeft geleend alsmede van zijn achterstallige inkomsten daaruit en de onkosten daarvan, wanneer althans de heer en vrouwe van Brederode deze heerlijkheid en goederen niet zelf willen of kunnen lossen.

Allen den ghenen die desen brief sullen sien jof horen lesen make ic cond Jan van Polanen, ridder, dat so wannere mijn lieve here die grave van Heynnegouwen^b, van Holland^c, van Zeland ende here van Vriesland ane hem lossen wille die heerscippie ende tgoed van Brederode, dat ic nu ter wilen toet enen onder pande hebbe ende houde van heren Heynrike, here van ^d Brederode, ende vrouwe Ysebeel van Fontaynis, vrouwe van Bredenrode, sinen wive, voir alsulke^e scult ende in alsulke voirwaerden alse die brieve houden die dair of ghemaict sien ende ghegheven waren int jair ons Heren M^o CCC^o zeven ende dortich op sinte Jacobs avonde^f, die wilke mijn lieve here die grave voirs. ende die here ende die vrouwe van Brederode voirnoemt mit horen zeghelen bezeghelt hebben, dat hijt lossen mach also verre alset die here ende die vrouwe van Brederode voirs. niet lossen en wouden of dat hoirre ghebrake, over mids dat hi mi ghenoech doe van twaelf hondert ponden Hollands^g die ic dair op ghelient hebbe, ende van alsulken afterstallen renten alse mi dair of afterstaen sullen, ende van alsulken coste alse ic omme dat goet ende omme^h die heerscippien ghedaen sel hebben, na allen den voirwaerden dat die brieve voirs. dair of houden; ende so wannere dat mijn lieve here die grave mi ghenoech ghedaen hevet van sulken ghebreke alse ic hier of hebben sal na den voirs. voirwaerden alse die voirs. brieve dair of houden, so ghelove ic quite te scelden die voirwaerden voirs. gheheel ende al voir mi ende voir mine nacomelinghe toet mijns lieves heren sgraven behoef, also verre alset die here ende die vrouwe van Brederode voirnoemt niet lossen en wouden of dat hoerre ghebrake.

In oirconde desen brieve bezeghelt mit minen zeghele. Ghegheven tsaterdaghes na onser Vrouwen dach nativitas int jair ons heren M° CCC° zeven ende dortich.