Registers van de Hollandse grafelijkheid 1299-1345

Graaf Willem IV behoudt zich het recht voor om elk jaar, of tussentijds, de schepenen en raden van Dordrecht af te zetten en aan te stellen; voorts stelt hij te Dordrecht twee jaarmarkten in, de een in het voorjaar en de ander in het najaar, beide 14 dagen dagen durend, geeft degenen die deze markten bezoeken tolvrijdom in zijn land, en bepaalt de verschuldigde markttol die op bepaalde aldaar verkochte producten zal worden geheven.

Vgl. nr. WI 316.

Willem grave van Heynnegouwen^c etc. maken cond allen luden dat wi bi ghoeden versiene ende wel beraden mit onsen lieven oem heren Janne van Heynnegouwen^d, here van Byaumond, ende mit anders onsen ghemenen Rade over een ghedraghen zijn, omme nutscap ende oirbairs ons selves ende onser stede van Dordrecht^e, ghegheven hebben ende gheven voir ons ende voir onse nacomelinghe onsen lieven poirteren ghemenlike van onser stede voirs. ende horen nacomelinghen, omme menighen trouwen dienste dien si ons ende onsen ouders ghedaen heeft ende ons ende onsen nacomelinghen noch doen zullen, alsulc recht ende vryheden also hier na bescreven staen^f.

In den ersten soe zullen wi ende onse nacomelinghe elcs jairs onse scepene ende raetslude van Dordrecht of doen ende verniewen ende weder an doen die ons ghenoeghen, al hadden si in den selven jare in den gherechte gheweest, also verre alse wi binnen onsen lande van Hollant zijn; ende ware dat sake dat wi in onsen lande van Hollant niet en waren, soe souden wijt doen also vroech alse wi binnen den lande quamen, of binnen XIIII daghen dair na. Ende voert moghen wise also dicke of ende an doen binnen jairs als ons ghenoeghen zal.

Vort hebben wi hem ghegheven ende gheven voir ons ende voir onse nacomelinghe twe jair marcten tsyairs, dair of dat die eerste inghaen zal ende beghinnen up den XXVI^ste dach na Paisschedach als men zinghet Resurrexstio Domini, ende sal duren XIIII daghe dair na; ende die ander marct zal inghaen ende beghinnen up den X^sten dach na sinte Baven dach^g, ende sal duren XIIII daghe dair na. Ende alle die ghene die tot enighen van desen marcten of tot beyden comen zullen, die zullen tollen vry varen ende keren doir onse lant ende onbeset. Ende alle die ghoet dair copen, die zullen ons dair of marct tollen gheven in diere manieren dat hier na bescreven staet, dat is te weten van den lakenen die dair comen zullen ende dair vercoft werden, van elken scaerlaken VIII d. Hollands^h, van elken ghemengheden of gheverweden laken VI d. Hollands, van ene stripten laken IIII d. Hollands, van elken witten of grawen laken II d. Hollands; van elken pairde IIII d. Hollands, van elken rinde II d. Hollands, van elken verken I d. Hollands, van elken scape o.ⁱ Hollands. Voert van allen anderen goede dat dair vercoft werde selmen ons gheven van elker march te tolne I d. Hollands, ende te wissel I d. Hollands, ende elc march voir XIIII s. Hollands gherekent; ende dat beneden enre march wairdich ware ende vercoft worde, dat en zal niet gheven. Ende in desen marcten zetten wi uut dat gheen marct recht pleghen en zal wijn, hout, coern ende sout, ende oec al ander ghoet dat van der zee comen sal alse wolle, was, werc, yser, spec, stael ende hairinc^j, ende dit sal sine rechte tolne gheven als men dairof pleghet te gheven buten der marct. Ende dit is behouden al der vryheden ende recht van onsen vryen steden, ende behouden alsulcs rechts alse die here van der Merweden heeft binnen onser stede van Dordrecht voirs. ende sine vorders ^k hair toe ghebrocht hebben ende ghebruict. Ende alle saken voirscreven sonder archlijst.

Ghegheven in den Haghe des dinxendaghes na sinte Katerinen dach anno XLII^o.