Registers van de Hollandse grafelijkheid 1299-1345

Graaf Willem III verkoopt het ambacht van Hoebuic Domaasz. in het Haaimanambacht aan Pieter Allard Bruinsz., met de bepaling dat Wolfert Elliksz. en Nicolaas Hugenz. wanneer zij dat wensen ieder een kwart van het ambacht kunnen kopen, op zekere voorwaarden; maar wanneer Wolfert en Nicolaas niet tijdig betalen, zal Pieter het hele ambacht kopen, of de helft waarbij de andere helft aan diens echtgenote zal toekomen.

De onderstaande tekst is gebaseerd op afschrift B.

Wi Willaem^b grave van Henegouwen^c, van Holland^d etc. maken cond etc. dat wi Pieter Allaerds^e Brunen sone vercoft hebben Hoybuyc^f Dommaes^g soens^h ambocht, dat groet es tieghens hondert ende twie ende twintich ghemete ende dertich ghemete Haymen ambochts, elc ghemet van den ambocht voerseit ter goeder maten, omme vijftichⁱ scellinghe Tornois^j, den groten over sestien penninghe gherekent, ende elc ghemet van den heymen ambocht voers. omme tien scellinghe Tornois^k, payments voers., tebetalen die ene helfte binnen viertien nachten naest comende ende die ander helfte daer na^l tote Bamisse^m naest comende, ende dat onsen rentemeister van Zelandⁿ verzekeren binnen Zerixee also dats hem ghenoecht, in deser manieren^o dat Wolfaerd^p Elix^q sone een verendeel^r daer of hebben zal ende Clais Hughen zone een verendeel, also verre als siet selve betalen moghen^s ende tote hoers selfs behoef^t houden willen. Ende si hebben hem voer ons verwilcoert dat si dit^u ambocht voers. niemant vreemder^v vercopen en zullen, hi en sie ghecomen van rechter stamme van Hoybuics vader weghen voers.; ende souder coep anegaen, zo zoude Hoybuycs^w dochter voers. jof hoir kinder die naeste daer of^x wesen. Voerd ghevielt dat si enighen twy^y onderlinghe hadden, so souden si dit^z voerseide ambocht onderlinghe delen, op ene pene van vijftich ponden Tornois^a', ende die zouden wi hebben van den ghenen dies niet delen wilde^b'. Ende en moghen Wolfaerd^c' jof Clais voers. dit ghelt niet betalen ten eersten daghe jof versekeren ten lesten, zo sal Pieter die Brune tghelt gheven ende tambocht allene hebben; ende hoe vele dat hijs betaelt, eest al jof half, daer zal hi die ene helfte of hebben ende sijn wijf die ander helfte, ende die van ons ontfaen. Ende waer dat zake dat Hoybuyc^d' voers. te live bleve als hi joft^e' God wil zal tote Bamisse toe jof langher, so souden wi tleste ghelt datmen tote Bamisse ghelden zoude verbeide^f' tote twien maenden na ziere doet. Ende es dat zake dat Wolfaerd voers. ende Clais betalen hoer verendeel alse voerscreven es ende versekeren, so sel malc sijn verendeel van ons ontfaen^g', ende wi zullen malc onsen brief daer of gheven van also vele als hijs van ons ontfaet.

In orkonde desen brieve etc. Ghegheven tote Dordrecht des woensdaghes voer sinte Laurens daghe int jaer ons Heren M CCC ende^h' een ende twintich.