Registers van de Hollandse grafelijkheid 1299-1345

Graaf Willem III geeft zijn valkenier Michiel van Enghien een jaarrente van 24 pond Tournois, mede ter compensatie voor de prebende in de Sint Pieterskerk te Middelburg die deze hem teruggegeven had, welke rente door de rentmeester van Zeeland uitgekeerd zal worden.

De onderstaande tekst is gebaseerd op afschrift B.

Wi Willaem^a grave van Henegouwen^b, van Holland^c etc. maken cont allen luden^d dat wi Michiel van Adenghen onsen valkenaer omme trouwen dienst dien hi ende sine broeders ghedaen hebben ende hi ons noch doen zal, ende omme dat hi ons weder opdroech^e ende resigneerde die provende^f van sinte Pieters in Middelburch^g die wi hem ghegheven hadden, ^h daerⁱ wi onsen capelaen mede versien hebben, zo hebben wi Michiel voers. ghegheven ende gheven met desen brieve elkes jaers also langhe als hi levet vier ende twintich pond Tornois^j, den groten coninx Tornois^k over zestien penninghe gherekent^l, die wilke jaer rente wi hem bewisen elcs sjaers opteheffen ende tontfanghen tote Kersavent^m an onsen rentemeister van Zelandⁿ toter tijd toe dat wise hem elwaer^o in goeden zekeren steden^p bewiset hebben; ende ombieden onsen rentemeister van Zeland^q die nu es jof hier na wesen zal dat hi Michiel voers. sonder ander ghebot van ons te hebben die voerscreven renten jaerlix also langhe als hi leeft uyt reke ende^r betale van onsen weghen toten termine voerscreven, toter tijt toe^s dat wise hem andersijns bewiset hebben, ende daer bi zullen wi onsen rentemeister voers. jaerlix van^t also vele quiten in sine rekeninghe als hi Michiel voers. sine jaerrenten voers. betaelt^u zal hebben.

Ende omme dat wi willen dat dit vaste ende stade^v blive, zo hebben wi desen brief open bezeghelt met onsen zeghele. Ghegheven tote Valenchijn^w des^x vridaghes voer Ascentien dach int jaer ons Heren M CCC een ende twintich.