Registers van de Hollandse grafelijkheid 1299-1345

Graaf Willem III benoemt Jan Hendrik Bendvriendsz. tot dijkgraaf in Zuid-Walcheren tussen Arnemuiden en de duinen, en stelt enkele van diens bevoegdheden vast.

De onderstaande tekst is gebaseerd op afschrift B.

Wi Willaem^b grave van Heynnegouwen^{c d} etc. maken cond etc. dat wi Jan^e Heynric Bendvriends sone bevolen hebben ende bevelen mit desen brieve onse dijcgravescip besuden Walgheren^f van Arnemuden tote den dunen toe te bedriven ende te verwaren van onsen weghen, tonser eren ende tote des ghemeens lands orbaer^g, ende gheven hem macht van onsen weghen ghesuoerne te maken, of ende an te doene alst hem orbaer denken sal; ghebot te legghen; te bedrivene dike, wateringhe, weghe, ende die te berechten mit sinen ghesuoernen; onse ghelt daer in te legghen alst te doene es ende weder in te panden vierscat bi sinen ghesuoernen, na den rechte van den lande; vrede te vermanen, ende wie hem vrede wederseyde die verboirde tsestich pond Tornoyse^h, die ene helfte jeghens ons ende die ander helfte jeghens hem ende sine ghesuoerne jof manne die dair mit hem comen. Ende omme dat onse ghemene manne dit ghewilcoirt hebben, so ombieden wi allen onsen luden die in den bedriveⁱ van onser dijcgravescip wonen dat si Janne onsen dijcgrave voirnoemd onderhorich ende onderdanich sien ende hem helpen ende vorderen tote allen onsen rechte, ende wie dat des niet en dede jof dien wederstonde, wi soudent an hem verhalen als an den ghenen die onse land verderven wilde; gheduren^j tote onsen weder segghen.

In orkonde ^k etc. Ghegheven in Middelburch^l des vridaghes na Paischen int jaer ons Heren M CCC^o drie ende twintich.