Registers van de Hollandse grafelijkheid 1299-1345

Graaf Willem III instrueert baljuw, schepenen en burgemeesters van Zierikzee hoe zij het toezicht op het begijnhof aldaar dienen uit te oefenen.

Wi Willaem^b grave etc. onsen lieven ende ghetrouwen bailiu, scepen ende burmeisters van onser porte van Zierixee^c salut etc. Wi ombieden u ende willen dat ghi den beghinehof van Zierixee^d ende die joncfrouwen die dair in woinen jof wonen sullen van onsen weghen houd in sulken state^e ende in sulken wesen van clederen te draghen ende van eersamer wanderinghe, ende dat men weyt als si wanderen willen wair si wanderen, alse die joncfrouwen sien die wonen int beghin^f hof in Middelburch^g, ende dat gi die papen also^h goid hebt dat sise in rusten ende onghemoyd laten, ende dat gi die joncfrouwen die den hof te berechten hebben also goid hebt dat si des hoves goid ende der fermerien goid nerghent en keren ten sie ter armer behouf die in der fermerien sien, jof in den hove jof in des hoves oirber, ende dat si den armen joncfrouwen die hoir broed mid den handen winnen moeten also verre als si behoudenlike wanderen niets te hard en sien; des en lait niet. God sie med u.

Ghegheven tote Zierixeeⁱ des dinxendaghes na Belokene Paisken int jaer van^j XXXI°.